Монгол Улс энэ онд нийт 650.1 мянган га талбайд тариалалт хийх зорилт тавьсан бөгөөд үүнээс 310.1 мянган га-д улаанбуудай, 17.1 мянган га-д төмс, 16.5 мянган га-д хүнсний ногоо, 144.1 мянган га-д малын тэжээл, 103.7 мянган га-д тосны ургамал, мөн 7.9 мянган га-д жимс жимсгэнэ тарьж ургуулахаар төлөвлөжээ.
Энэхүү ажлыг Монгол Улсын Засгийн газраас баталсан “Атрын IV тариалангийн тогтвортой хөгжлийн аян”-ын хүрээнд хэрэгжүүлж байгаа бөгөөд тариалалтыг технологийн хугацаанд үр дүнтэй зохион байгуулах, аймгуудад тодорхой чиглэл, үүрэг өгч, зохион байгуулалтын ажлууд хийгдэж байна.
2025 оны зургаадугаар сарын 13-ны өдрийн байдлаар нийт тариалалтын явц 66.3 хувийн гүйцэтгэлтэй байгаа тухай Хүнс, хөдөө аж ахуй, хөнгөн үйлдвэрийн яам мэдээллээ. Үүнд:
- Улаанбуудай – 259.5 мянган га, буюу төлөвлөгөөний 83.7 хувь
- Бусад үр тариа – 31.3 мянган га, буюу 61.9 хувь
- Төмс – 10.2 мянган га, буюу 60.2 хувь
- Хүнсний ногоо – 8.4 мянган га, буюу 51.2 хувь
- Малын тэжээл – 26.1 мянган га, буюу 18.1 хувь
- Тосны ургамал – 95.1 мянган га, буюу 91.6 хувь тус тус гүйцэтгэлтэй байна.
Ийнхүү тариалалтын гол нэрийн ургамлуудын дийлэнх нь технологийн хугацаандаа амжилттай хийгдэж, улаанбуудай, тосны ургамлын хувьд төлөвлөгөөг хангах шатандаа оржээ. Харин малын тэжээлийн ургамлын тариалалт хурдац багатай байгаа нь анхаарал хандуулах асуудал болж байна.
