Ховд аймгийн Мөст сумын уугуул, МҮБХ-ны тэргүүлэгч, хурандаа Цэдэвийн Мягмарсүрэн зааны алдар гавьяаг мөнхжүүлэх зорилготой хүчит 128 бөхийн барилдаан амжилттай болж өндөрлөлөө. Тус хүндэтгэлийн барилдаанд Ховд аймгийн Буянт сумын харьяат, улсын аварга Оргихын Хангай өнгөлж, түрүү бөхийн бай шагналыг хүртсэн бол Архангай аймгийн Батцэнгэл сумын бөх, улсын харцага Б.Зоригтбаатар үзүүрлэж, үзэгч олноо баясгав.
Барилдааны явцад улсын заан Б.Бат-Өлзий болон аймгийн арслан Ц.Төмөрцоож нар их шөвөгт шалгарсан бол дунд шөвгийн наймд улсын харцага Э.Даш тэргүүтэй хүчтэнүүд үлдэж, уран мэхээ уралдуулсан юм. Энэхүү арга хэмжээний үеэр Ховд дэвжээний хамт олон болон Ц.Мягмарсүрэн зааны үе тэнгийн нөхөд, шавь нар нь түүнд хүндэтгэл үзүүлж, дурсгалын зүйлс гардууллаа.
Барилдааны бай шагнал болон онцлох үйл явдлууд:
- Түрүү болон үзүүр бөх: Түрүүлсэн О.Хангай аварга 8 сая төгрөг, үзүүрлэсэн Б.Зоригтбаатар харцага 5 сая төгрөгийн шагнал гардлаа.
- Их шөвгийн бөхчүүд: Дөрөвт үлдсэн бөхчүүд тус бүр 3 сая төгрөгийн бай шагнал авсан юм.
- Үзэгчдийн азтан: Барилдааны үеэр супер азтанд суудлын автомашин, мөн 5 азтанд тус бүр 1 сая төгрөг гардуулж, үзэгчдийг баярлуулав.
- Тусгай шагнал: “Манди баши” ХХК-ийн зүгээс улсын заан Б.Бат-Өлзий, улсын харцага О.Мөнх-Эрдэнэ нарт Японы эрүүл мэндийн витамин бүтээгдэхүүний дээжээс бэлэглэлээ.
Монголын Үндэсний Бөхийн Холбооноос зохион байгуулсан энэхүү барилдаан нь үндэсний бөхийн өв соёлыг түгээх, ахмад заануудаа алдаршуулах соёлын томоохон арга хэмжээ боллоо.
