Аргентины Парана голын эрэгт пиранья загас олноор дайрч, хэдэн арван хүнийг хазаж гэмтээсэн байна. Энэ талаар Medee.news агентлаг The Sun хэвлэлийг иш татан мэдээллээ.
Амралтын өдрүүдээр алдартай далайн эргийн хамгаалагч Алехандро Мартин нийт 46 хүн пиранья загасанд хазуулж хохирсныг баталсан юм. Хохирогчдын ихэнх нь хүнд гэмтэл авсан бөгөөд нэг хүн хуруугаа алдсан харамсалтай хэрэг гарчээ. Гэмтсэн хүмүүст газар дээр нь эмнэлгийн анхны тусламж үзүүлсэн бол зарим нь орон нутгийн эмнэлэгт хандсан байна. Хамгаалагч Мартин “Би гурван ч анхны тусламжийн хайрцаг дуусгалаа” хэмээн нөхцөл байдал ямар хүнд байсныг онцолжээ.
Эрх баригчдын авсан арга хэмжээ
Аврах багийнхан амрагчдыг уснаас яаралтай гарахыг тушаасан байна. Виктория хотын захиргаанаас иргэдэд дараах анхааруулгыг хүргүүллээ:
- Усанд орохоос татгалзах.
- Хүүхдүүдээ сайтар хараа хяналтандаа байлгах.
- Загасанд хазуулсан тохиолдолд эмнэлгийн байгууллагад яаралтай хандах.
Өмнө нь Бразилын нэгэн аялал жуулчлалын бүсэд пиранья загасны сүрэг 10 хүнийг хазаж гэмтээж байсан тохиолдол гарч байжээ.
