Монгол Улсын Ерөнхий сайд Г.Занданшатар 2026 оны хоёрдугаар сарын 8-ны ням гарагт Тавантолгойн ордод ажиллаж, нүүрс баяжуулах үйлдвэрийн тэжээлийн дамжлага, бутлуурын цогцолбор болон авто ачилтын байгууламжийн нээлтэд оролцлоо. Энэхүү бүтээн байгуулалт нь өнгөрсөн оны долоодугаар сард Засгийн газраас өгсөн үүрэг даалгаврын биелэлт бөгөөд уул уурхайн салбарт байгаль орчинд ээлтэй, дэвшилтэт технологи нэвтрүүлж буй томоохон алхам болж байна.
Шинэ байгууламж ашиглалтад орсноор гарах гол өөрчлөлтүүд:
- Тээвэрлэлтийн үр ашиг: 12.6 км үргэлжлэх конвейерийн систем нь нүүрсийг тасралтгүй, найдвартай зөөвөрлөх нөхцөлийг бүрдүүллээ.
- Зардлын хэмнэлт: Авто тээврийн зардал 78 хувиар буурч, жилд дунджаар 267.5 тэрбум төгрөгийн шууд хэмнэлт гарах тооцоотой байна.
- Байгаль орчин ба аюулгүй байдал: Тээвэрлэлтийн явцад үүсдэг тоосжилт 90 хувиар багасаж, авто тээврийн осол гарах эрсдэлийг “тэг” түвшинд хүргэжээ.
- Зах зээлийн тэлэлт: Нүүрсийг сорчлохгүйгээр экспортод гаргаж, зөвхөн урд хөршөөс гадна Япон, БНСУ, Энэтхэг зэрэг гуравдагч зах зээлд гарах боломж нээгдэж байна.
Ерөнхий сайдын зүгээс компанийн засаглалыг сайжруулах, ил тод байдлыг хангах чиглэлээр удирдлагуудад хатуу үүрэг даалгавар өгөв. Үүнд, энэ оны хоёрдугаар улиралд багтаан гүйцэтгэх удирдлага болон ТУЗ-ийн гишүүдийг нээлттэй сонгон шалгаруулах, сүүлийн гурван жилийн санхүүгийн тайланд олон улсын аудит хийлгэхийг даалгалаа. Мөн “Олон нийтийн хяналтын зөвлөл”-ийг байгуулж, иргэдийн хяналтыг нэмэгдүүлэхээр болсон байна.
Түүнчлэн Бортээгийн ордыг эдийн засгийн эргэлтэд оруулах ТЭЗҮ-г боловсруулж, Засгийн газарт танилцуулахыг үүрэг болголоо. Компанийн үйл ажиллагааг олон улсын жишигт нийцүүлэн нээлттэй болгосноор “Баялагтаа эзэн Монгол” зорилтын хүрээнд иргэдэд хүртэх үр өгөөж нэмэгдэнэ гэдгийг Г.Занданшатар сайд онцлон тэмдэглэв.
