Цусны сэлбэлт судлалын үндэсний төв (ЦССҮТ)-өөс Гэмтэл согог судлалын үндэсний төв (ГССҮТ) рүү цус, цусан бүтээгдэхүүнийг энэ сарын 26-ны өдөр дроноор тээвэрлэх ажиллагааг амжилттай зохион байгууллаа. Агаараар тээвэрлэх энэхүү орчин үеийн шийдэл нь замын түгжрэлээс үл хамааран ердөө 10 минутын дотор шаардлагатай бүтээгдэхүүнийг зорьсон газарт нь хүргэж чадсан юм. Энэхүү технологийн шийдэл нь яаралтай хагалгаа болон тусламж үйлчилгээний үед цаг алдалгүй ажиллах боломжийг бүрдүүлж байна.
Тус төвд анх 2025 онд дроноор цус хүргэж байсан бол энэ удаагийнх хоёр дахь тохиолдол болж байна. ГССҮТ-ийн хувьд өнгөрсөн жилийн хугацаанд нийт 9731 нэгж цус, цусан бүтээгдэхүүнийг яаралтай тусламж үйлчилгээндээ ашигласан статистик мэдээ бий. Үүний үр дүнд 2533 үйлчлүүлэгчийн амь нас, эрүүл мэндийг аврах чухал ажиллагааг гүйцэтгэжээ.
Одоогоор ЦССҮТ-ийн зүгээс дараах хүрээнд үйл ажиллагаагаа тэлээд байна:
- Нийт 14 эмнэлэгт цус, цусан бүтээгдэхүүнийг дроноор тээвэрлэн хүргэж байна;
- Эмнэлгийн яаралтай тусламжийн бэлэн байдлыг хангах хугацааг мэдэгдэхүйц богиносгож байна;
- Зам тээврийн нөхцөл байдлаас шалтгаалах эрсдэлийг бууруулж, хүргэлтийн найдвартай байдлыг хангаж байна.
Цаашид энэхүү технологийг нэвтрүүлснээр цаг алдалгүй тусламж үзүүлэх боломж бүрдэж, хүний амь нас аврах алтан мөчийг хожих давуу талтай юм. Эрүүл мэндийн байгууллагуудын хэрэгцээ шаардлагад нийцсэн дрон тээвэрлэлтийн үйлчилгээ нь салбарын технологийн шинэчлэлийг илтгэж байна. Ийнхүү агаараар тээвэрлэх хүрээ нэмэгдэх тусам эмнэлгийн тусламж үйлчилгээний чанар, хүртээмж шинэ шатанд гарах хүлээлттэй байна.
