ОХУ-ын Хойд Кавказын бүс нутагт өнгөрсөн долоо хоногоос эхлэн асгарсан усархаг борооны улмаас Дагестанд байгалийн гамшиг нүүрлэлээ. Даваа гарагийн байдлаар үерийн улмаас таван хүн алтан амиа алдаж, олон мянган оршин суугч орон гэрээсээ дүрвэхэд хүрээд байна. Орон нутгийн эрх баригчид нөхцөл байдал хүнд байгааг анхааруулж, авран хамгаалах ажиллагааг эрчимжүүлжээ.
Сошиал сүлжээгээр тархсан дүрс бичлэгүүдэд бүс нутгийн хот тосгод бүхэлдээ усанд автаж, зам талбайгаар автомашинууд хүчтэй урсгалд автан урсаж буй дүр зураг харагдана. Тухайлбал, Дагестаны нийслэл Махачкала хотод орон сууцны олон давхар барилга хэсэгчлэн нурж, стратегийн чухал ач холбогдолтой Кавказын хурдны замын гүүр эвдэрч сүйрсэн нь нөхцөл байдал хэр хүнд байгааг илтгэж байна.
ОХУ-ын Онцгой байдлын яамнаас мэдээлснээр, усархаг борооны дараа гол мөрний усны түвшин огцом нэмэгдэж, суурьшлын бүсүүд дахин үерт автсан юм. Тус байгууллагаас “Хүчтэй борооны дараа усны түвшин нэмэгдэж, гудамжнууд, орон сууцны хорооллууд дахин үерт автлаа” хэмээн мэдээлэл өглөө. Харамсалтай нь, хоёр автомашин үерт урсах үеэр дотор нь байсан дөрвөн хүн, тэдгээрийн дотор гурван хүүхэд амиа алдсан бол өмнө нь хөрсний нуралтаас болж нэг иргэн нас барсан нь тогтоогджээ.
Бүс нутгийн хэмжээнд учирсан хохирол болон одоогийн нөхцөл байдлыг тоймловол:
- Каспийн тэнгисийн эрэг орчмын Дербент дүүрэгт 2,000 орчим айл өрх усанд автжээ.
- Эрчим хүчний дэд станцууд үерт автсаны улмаас Дагестаны 20 орчим дүүрэгт цахилгаан тасарсан байна.
- Өнгөрсөн долоо хоногт тохиосон эхний үерийн үеэр 3,300 гаруй иргэнийг нүүлгэн шилжүүлээд байв.
- Орон нутгийн удирдлагуудын мэдээлснээр эхний ээлжинд 50 сая долларын хохирол тооцогдсон ч бодит алдагдал үүнээс хамаагүй өндөр байх магадлалтай.
Бороо ойрын өдрүүдэд үргэлжлэн орох төлөвтэй байгаа тул гамшгийн бүсээс иргэдийг яаралтай нүүлгэн шилжүүлэх ажил эрчимтэй үргэлжилж байна. Албаныхан иргэдийг сонор сэрэмжтэй байж, албан ёсны мэдээлэл зааварчилгааг дагахыг уриаллаа.
