УИХ-ын дарга шинэ засгийн ажлыг гацаав уу? Спикерийн бойкот улс төрийн хямрал дагуулж байна

Монгол Улсын 34 дэх Ерөнхий сайдаар Г.Занданшатарыг УИХ-ын 107 гишүүний 92.3 хувийн дэмжлэгтэйгээр томилсон ч шинэ Засгийн газрын бүрэлдэхүүнийг УИХ-д өргөн мэдүүлэх ажиллагаа төлөвлөсөн ёсоор явагдсангүй. УИХ-ын дарга Д.Амарбаясгалан чуулганы хуралдааныг завсарлуулснаар шинэ танхимыг бүрдүүлэх үйл явц гацлаа. Энэхүү шийдвэр нь хувийн ашиг сонирхолтой холбоотой гэх таамаг хөвөрч, улс төрийн хүрээнд халуун сэдэв болоод байна.

Түүнийг УИХ-ын гишүүн Б.Энхбаярыг Хууль зүй, дотоод хэргийн сайдаар томилохыг эсэргүүцсэнээсээ болж шинэ засгийг бойкотолж эхэлсэн гэх мэдээлэл тархаад байна. Үүний цаад шалтгаан нь Б.Энхбаяр өмнө нь Тавантолгойн Бортээгийн уурхайд Д.Амарбаясгалангийн хамаарал бүхий “Админерал” компани онцгой эрхтэйгээр үйл ажиллагаа явуулж буй талаар мэдээлэл дэлгэснийг УИХ-ын дарга хувийн өш хонзон гэж хүлээж авсан байж болзошгүй гэж улс төрийн хүрээнд хардаж байна.

Үндсэн хуулийн дагуу Ерөнхий сайд танхимаа бүрдүүлэх эрхтэй бөгөөд УИХ-ын дарга нь парламентын үйл ажиллагааг зохион байгуулах үүрэгтэй. Гэтэл Д.Амарбаясгалан чуулганыг санаатайгаар гацаасан нь эрх мэдлээ хэтрүүлсэн, Үндсэн хуулийг зөрчсөн үйлдэл хэмээн үзэх боллоо.

Мөн УИХ-ын гишүүн Э.Болормаа шинэ танхимд эмэгтэй гишүүдийг заавал багтаах ёстой гэсэн шаардлага тавьж, Ерөнхий сайдын бүрэн эрхэд шууд нөлөөлөх оролдлого хийсэн нь Үндсэн хуулийн эсрэг гэмт хэрэг гэж шүүмжлэгдэж байна. Э.Болормаа өмнө нь сонгуулийн үеэр гадаадын компаниас хууль бусаар хандив авсан гэх дуулианд холбогдож байсан бөгөөд энэ асуудалд хууль хяналтын байгууллага анхаарах шаардлагатай болсон талаар улс төр судлаачид үзэж байна.

Хамгийн сонирхолтой нь, энэ бүх явцын цаана Ерөнхий сайд асан Л.Оюун-Эрдэнийн нөлөө байна гэх хардлага улам газар авч байгаа юм. Түүнийг огцорсон ч эрх мэдэл, албан тушаалаас зууралдан, төрийн үйл ажиллагаанд нөлөөлөх оролдлого хийж байгаа нь анхаарал татаж байна. Түүнтэй холбоотой авлигын хэрэг, улс төрийн тоглолт, стратегийн объектууд дээр гарч буй ослууд хүртэл сэжиг дагуулж эхэллээ. Тухайлбал, УИХ-аар итгэл үзүүлэх асуудлыг хэлэлцэхийн өмнөх шөнө Дулааны цахилгаан станцад гал гарсан нь санаатай үйлдэл байсан уу, эсвэл тохиолдол байсан уу гэдэг нь одоогоор тодорхойгүй хэвээр байна.

Эдийн засагт улаан дохио аль хэдийнэ ассан байхад улс төрийн дотоод зөрчил, нам дотрох ашиг сонирхлын зөрчлийг түрүүлж тавих нь улсыг хямралд хүргэж болзошгүй. Эдийн засгийн өсөлт гэж нэрлэгдэж буй үзүүлэлтүүд энгийн иргэдийн амьдралд мэдрэгдээгүй, харин ч инфляц, орлогын тэгш бус хуваарилалт улам нэмэгдэж байгааг олон нийт онцолж байна.

Өнөөдөр нам, фракцийн хуваагдлаас илүүтэйгээр ард иргэдийн амьдрал, төрийн тогтвортой байдал, Засгийн газрын шуурхай ажиллах нөхцөлийг хангах нь нэн тэргүүний асуудал болоод байна. Улстөрчид хэн нь хэний эсрэг гэдэгт бус, харин улс орноо хэрхэн дампууралд хүргэхгүй авч үлдэх вэ гэдэгт анхаарах цаг иржээ.