“Хүрээ цам–Даншиг наадам 2025” энэ сарын 28, 29-ний өдрүүдэд Хүй долоон худагт зохион байгуулагдана. Энэхүү арга хэмжээний хүрээнд нийслэлийн иргэд, жуулчид, соёл сонирхогчдод зориулсан худалдаа, үйлчилгээний зохион байгуулалтыг сайжруулж, нийт найман секторт хуваасан 120 цэгт албан ёсны зөвшөөрөлтэй хоол үйлдвэрлэл, худалдаа, үйлчилгээ үзүүлэхээр болсон байна.
Наадам хоёр үндсэн бүсэд төвлөрнө. Эхнийх нь соёл, урлагийн тайз, талбай, хоёр дахь нь худалдаа, үйлчилгээний хэсэг юм. Үйлчилгээний бүсүүдэд Монгол гэр болон фүүд трак ашиглан иргэд, аж ахуйн нэгжүүд үйлчилгээ үзүүлэх бөгөөд дур мэдэн зөвшөөрөлгүй худалдаа эрхлэхийг хориглох зохицуулалт үйлчилнэ.
Худалдаа, үйлчилгээний талбайн бүтэц дараах байдлаар тодорхойлогдож байна:
A болон H секторуудад нийслэлийн есөн дүүргийн соёлын болон хүндэтгэлийн гэрүүд, бэлтгэлийн асрууд байрлана.
B сектор нь хүнсний үйлдвэрлэлийн үзэсгэлэн худалдаа, мэргэжлийн холбоодын танилцуулгад зориулагдсан.
C болон D секторуудад худалдаа, хоол үйлдвэрлэл явагдана.
E секторт явуулын фүүд тракууд байрлаж, хоолны үйлчилгээ үзүүлнэ.
F болон G секторуудад хүүхдийн тоглоом, хуурайлах өрөө зэрэг гэр бүлд чиглэсэн үйлчилгээтэй байгууламжууд ажиллана.
Мөн энэ үеэр жижиг, дунд бизнес эрхлэгчдийн үзэсгэлэн худалдаа зохион байгуулагдах бөгөөд энэ нь үндэсний үйлдвэрлэл, гар урлал, гарааны бизнесүүдийг олон нийтэд сурталчлах ач холбогдолтой гэж зохион байгуулагчид онцолжээ.
