Канадын Ерөнхий сайд Марк Карни 9-р сард болох НҮБ-ын Ерөнхий Ассамблейн 80 дугаар чуулганы үеэр тус улс Палестиныг албан ёсоор улс хэмээн хүлээн зөвшөөрөх шийдвэр гаргасан талаар лхагва гарагт мэдэгдлээ.
Тэрээр мэдэгдэлдээ Израил, Палестин хоёр зэрэгцэн орших “хоёр улсын шийдэл”-ийг дэмжиж байгаагаа илэрхийлж, НҮБ-ын индрээс Палестины статусыг хүлээн зөвшөөрөхөө онцлон тэмдэглэсэн. Мөн Палестинд зайлшгүй шаардлагатай өөрчлөлт шинэчлэлтийг хэрэгжүүлэхэд Ерөнхийлөгч Махмуд Аббасын удирдаж буй засгийн газрын үүрэг чухал болохыг онцолжээ.
Тэр дундаа 2026 онд болох нэгдсэн сонгуульд Хамас бүлэглэл оролцохгүй байх, мөн Палестин улс зэвсэггүй байх тухай амлалтуудад үндэслэн Канад уг шийдвэрийг гаргасан болохыг Ерөнхий сайд дурдсан юм.
Сэтгүүлчийн зүгээс НҮБ-ын чуулганаас өмнө Канад улс шийдвэрээ өөрчлөх боломжтой эсэхийг асуухад Марк Карни “тийм хувилбар онолын хувьд байж болох ч би хувьдаа төсөөлөхгүй байна” хэмээн хариулжээ.
Ийнхүү Франц, Их Британи зэрэг улсуудад Канад нэгдэн, 9-р сард Палестиныг албан ёсоор улс хэмээн хүлээн зөвшөөрөхөө илэрхийлээд байна. Палестины Ерөнхийлөгч Махмуд Аббас энэ мэдэгдлийг “түүхэн шийдвэр” хэмээн үнэлж, Канадын талд талархал илэрхийлжээ. Харин Франц улс “бүс нутагт энх тайвныг бий болгох үйл хэрэгт Палестинтай хамтран ажиллах болно” гэсэн байр сууриа дахин нотолжээ.
Нөгөө талд Израилын Засгийн газар Канадын энэхүү шийдвэрийг эрс эсэргүүцэн, хурцаар шүүмжилж байна. Оттава дахь Израилын ЭСЯ-ны мэдэгдэлд “хариуцлага хүлээх чадваргүй, төрийн институци нь бүрэн ажилладаггүй, бодит удирдлагагүй байгаа Палестиныг улс хэмээн хүлээн зөвшөөрөх нь 2023 оны 10-р сарын 7-нд аймшигт халдлага үйлдсэн Хамас бүлэглэлийг шагнаж буйтай адил хэрэг” хэмээн тэмдэглэжээ.
