Олимпын хоёр удаагийн аварга, дэлхийн аварга шалгаруулах тэмцээний долоон удаагийн алтан медальт, Германы биатлоны шилдэг тамирчин Лаура Дальмайер 31 насандаа харамсалтайгаар амь насаа алджээ.
Өдгөө уулын спортоор хичээллэж байсан тэрбээр Пакистаны Харахорум нурууны Лайла оргил (6096 м)-д авиралт хийж байхдаа, 5700 метрийн өндөрт хүрсэн үедээ чулуун нурангид өртсөн байна. Нурангийн дараа тэрбээр амьд байсан бөгөөд хамт авирч явсан уулчнаараа дамжуулан гадна ертөнцтэй холбоо тогтоож чаджээ.
Гэвч тухайн бүсийн цаг агаарын таагүй нөхцөл, байгаль газар зүйн онцлог зэргээс шалтгаалан аврах ажиллагаа амжилтгүй болсон байна.
Лаура Дальмайер спортын карьераа 25 насандаа өндөрлүүлж, цаашдын амьдралаа байгаль, их уулс руу хандуулахаар шийдсэн юм. Тэрээр 4000-6000 метрийн өндөртэй 10 гаруй оргилд амжилттай авирч байсан, туршлагатай уулчин байжээ. Ууланд сэтгэл зүрхээ зориулсан энэ герман бүсгүйн амьдрал ийнхүү харамсалтайгаар төгслөө.
