Table of Contents
Жагсаалын шалтгаан
Филиппиний нийслэл Манила болон бусад хотуудад Ням гарагт олон арван мянган иргэд төрийн авлигыг эсэргүүцсэн жагсаалд оролцлоо. Үерийн гамшгаас урьдчилан сэргийлэх төсөл хөтөлбөрүүдэд зориулагдсан их хэмжээний хөрөнгө шамшигдуулсан гэх баримт ил болсон нь олон нийтийг бухимдуулжээ. Засгийн газар зөвхөн сүүлийн хоёр жилийн хугацаанд ийм төслүүдээс ойролцоогоор 2 тэрбум ам.доллар алдсан байж болзошгүй байна. Greenpeace-ээс гаргасан тооцоогоор зөвхөн 2023 онд уур амьсгалын өөрчлөлттэй холбоотой хөтөлбөрүүдээс 17.5 тэрбум ам.доллар замхруулсан гэжээ.
Байгалийн гамшиг ба бухимдал
Филиппин улс жил бүр дунджаар 20 орчим хар салхинд өртдөг бөгөөд байгалийн гамшигт хамгийн эмзэг орнуудын нэг. Энэ оны долдугаар сард борооны улирал, хар салхины улмаас олон тосгон усанд автаж, сая сая хүн орон гэргүй болох үед дээрх тоо баримтууд ил болсон юм. Хөрөнгө их зарцуулсан ч бодитой хэрэгжсэн төсөл байхгүй байгаа нь ард иргэдийн бухимдлыг улам дэвэргэв.
Жагсагчдын шаардлага
Жагсаалын үеэр католик шашны хамба нарын бага хурлын тэргүүн, кардинал Пабло Виржило Дэвид “Бидний зорилго бол тогтворгүй байдал үүсгэх биш, ардчиллаа бэхжүүлэх юм” хэмээн мэдэгдэж, эрх баригчдыг хариуцлагаа хүлээхийг уриаллаа. Иргэд албан тушаалтнуудын шамшигдуулсан хөрөнгийг буцаан авч, буруутай хүмүүсийг шоронд хорихыг шаардаж байв.
Жагсаалын явц
Манила хотын цэцэрлэгт болсон өглөөний жагсаалд 50,000 орчим хүн цугларч, үдээс хойш дахин хэдэн мянган хүн нэмэгдсэн байна. Жагсаал ерөнхийдөө тайван болсон ч цагдаа нар хоёр тусдаа мөргөлдөөний үеэр нийт 72 хүнийг баривчилжээ. Тэдгээрийн 20 нь хүүхэд байсан бөгөөд мөргөлдөөний үеэр цагдаагийн 39 албан хаагч бэртэж, жагсагчдын ашигласан нэг чиргүүл шатсан байна.
Авлигын дуулиан ба улстөрийн хямрал
Энэхүү дуулиан анх ерөнхийлөгч Фердинанд Маркосын ард түмэндээ тавьдаг илтгэлийн үеэр ил болсон бөгөөд тэрээр хараат бус мөрдөн шалгах хороо байгуулсан. Дараа нь парламентын сонсголын үеэр барилгын компанийн эзэн 30 орчим хууль тогтоогч, төрийн өндөр албан тушаалтнуудад бэлэн мөнгө өгснөө баталсан. Түүний гэр бүлийн тансаг амьдралын талаархи телевизийн ярилцлага олон нийтийн дургүйцлийг улам гааруулжээ.
Энэ хэрэгтэй холбоотойгоор Филиппиний сенатын ерөнхийлөгч Фрэнсис Эскудеро болон нийтийн танхимын спикер Мартин Ромуалдес нар огцорсон байна. Ромуалдес нь ерөнхийлөгч Маркосын үеэл бөгөөд Маркос өөрөө энэ дуулианд холбогдсон хэн ч шийтгэлээс зайлсхийх боломжгүй гэж мэдэгдсэн юм.
