Улаанбаатар хот дотоодын хөрөнгийн зах зээлд анх удаа 500 тэрбум төгрөгийн үнэт цаас амжилттай арилжаалж, үүнээс 300 тэрбум төгрөгийг Бөөрөлжүүтийн цахилгаан станцын бүтээн байгуулалтад зарцуулсан. Энэ хөрөнгө оруулалтын үр дүнд 150 МВт хүчин чадалтай эхний блок 2024 оны арванхоёрдугаар сард ашиглалтад орж, төвийн эрчим хүчний системд шууд нийлүүлэлт хийж эхэлсэн байдаг.
Үргэлжлүүлэн 2025 оны арваннэгдүгээр сарын 16-нд Бөөрөлжүүтийн станцын хоёрдугаар 150 МВт блок ажиллагаанд орж, нийслэл болон төвийн бүсийн эрчим хүчний найдвартай байдлыг улам тэлж байна. Хотын эрчим хүчний ачаалал жил бүр өсөн нэмэгдэж, дунджаар 1245 МВт-д хүрч байгаа энэ үед хоёр том эх үүсвэр ашиглалтад оруулсан нь томоохон дэмжлэг болсон.
2024 онд мөн Багануурын 50 МВт багтаамжтай батарей хуримтлуурын станц ашиглалтад орж, шөнийн илүүдэл эрчим хүчийг хуримтлуулан оргил ачааллын үед системд нийлүүлэх чухал үүрэг гүйцэтгэж эхэлсэн. Зөвхөн нэг жилийн хугацаанд уг станц төвийн системд 57.45 сая кВт.цаг эрчим хүч нийлүүлжээ. Энэ нь 2023-2024 оны өвөл нийслэлд үүссэн 200 МВт-ын эрчим хүчний дутагдлыг нөхөхөд чухал нөлөө үзүүлсэн.
Өнгөрсөн зун ТЭЦ-3 дээр гарсан осол ачааллын эрсдлийг нэмэгдүүлсэн ч Бөөрөлжүүтийн хоёрдугаар блокыг төлөвлөгөөнөөс хоёр сарын өмнө ашиглалтад оруулснаар эрчим хүчний систем тогтворжиж чадсан юм. Улмаар сүүлийн нэг жил гаруйн хугацаанд нийслэлээс нийт 350 МВт хүчин чадал бүхий гурван эх үүсвэрийг ашиглалтад оруулсан нь эрчим хүчний найдвартай байдлыг мэдэгдэхүйц өсгөв.
Цахилгаан тасалдал зөвхөн засварын үеийн төлөвлөгөөт зогсолтоор хязгаарлагдаж, аравдугаар сарын 16-нд ОХУ-аас нийлүүлдэг 220 кВ-ын шугам тасарсан ч төвийн систем ачааллаа дааж, эрчим хүчний хязгаарлалт хийхгүйгээр даван гарсан нь шинэ эх үүсвэрүүдийн ач холбогдлыг харуулж байна.
2026 оноос эхлэн нийслэл болон улсын эрчим хүчний сүлжээг илүү өргөн хүрээнд тэлэх зорилгоор төр, хувийн хэвшлийн хамтарсан томоохон төслүүд эхэлнэ. Үүнд:
- ДЦС-5 станцын барилга
- Хийн болон дулааны 5–7 шинэ станц
- Шат дараатай сүлжээ өргөтгөлүүд
Ийнхүү Улаанбаатар ойрын жилүүдэд эрчим хүчний хомсдолоос гарах стратегиа бодитоор хэрэгжүүлж эхэллээ.
2 комментария
Эрчим хүчний асуудал шийдэгдэх нь, сайхан мэдээ байна
Хотод цахилгаан тасрах нь цөөрөх байх гэж найдаж байна