Олон улсын нэр хүндтэй “Netflix” компанийн “Physical: Asia” телевизийн шоунд Монгол Улсыг төлөөлөн оролцож буй багийн ахлагчаар Улсын Үлэмж Бадрах Арслан Баярсайханы Орхонбаяр ажиллаж байгаа билээ. Тэрбээр энэхүү шоугаар дамжуулан монгол бөхийн хүч чадал, өв соёл, ёс жудаг, бахархлыг дэлхийн үзэгчдэд хүргэж байна.
Монголын үндэсний бөхийн холбооны мэдэгдэл
Монголын Үндэсний Бөхийн Холбооноос тус тэмцээнд оролцсон монгол багийн тамирчдад чин сэтгэлийн талархал илэрхийлж, дараах мэдэгдлийг нийтэлжээ.
“Монгол Улсын нэрийг дэлхий дахинд гаргаж, авьяас чадвар, ур ухаанаараа эх орныхоо бахархал болж буй Монголын багийн нийт тамирчдадаа гүн талархал илэрхийлье.
Түүнчлэн багийн ахлагч, Монгол Улсын Үлэмж Бадрах Арслан Баярсайханы Орхонбаяр танд Монголын ард түмний бахархлыг тээн, үндэсний бөхийн өв уламжлал, хүч чадал, самбаа тэсвэр, хатуужлыг дэлхийд таниулж байгаад Монголын нийт бөхчүүд болон бөх сонирхогчдын өмнөөс чин сэтгэлийн талархал илэрхийлье.”
Орхонбаярын оролцооны ач холбогдол
“Physical: Asia” шоу нь Азийн орнуудын хамгийн хүчтэй, бие бялдрын хувьд сорилт бүхий тэмцээнүүдийн нэг бөгөөд түүнд Монгол Улсын үндэсний бөхийн тамирчин оролцож буй нь үндэсний спортын үнэ цэнийг олон улсад сурталчлах том боломж гэж үзэж байна.
Орхонбаярын оролцоо нь Монгол бөхийн уламжлал, хүч чадлыг орчин үеийн спортын хүрээнд таниулж, залуу үеийг спортод урам зоригтой оролцох жишиг болгож байна.
