«Politico» агентлагийн мэдээлснээр, АНУ болон ОХУ-ын албаны хүмүүс энэ амралтын өдрүүдэд Флорида мужийн Майами хотод уулзаж, дайныг зогсоох нөхцөлийг хэлэлцэж магадгүй байна. Хэдийгээр уулзалтын төлөвлөгөө албан ёсоор батлагдаагүй байгаа ч дипломат хүрээнийхэн бэлтгэл ажлыг базааж байгаа аж.
Уулзалтад оролцох магадлалтай төлөөлөгчид:
- АНУ-ын талаас: Ерөнхийлөгч Д.Трампын тусгай элч Стив Уиткофф болон түүний хүргэн, бизнесмен Жаред Кушнер нар оролцох төлөвтэй байна.
- ОХУ-ын талаас: Оросын Үндэсний баялгийн сангийн тэргүүн Кирилл Дмитриев тэргүүтэй төлөөлөгчид хүрэлцэн ирж магадгүй.
- Украины оролцоо: Орос-Америкийн уулзалтын өмнө Украины Үндэсний аюулгүй байдал, батлан хамгаалах зөвлөлийн нарийн бичгийн дарга Рустем Умеров АНУ-ын талтай тусгайлан уулзахаар төлөвлөжээ.
Хэлэлцээрийн гол сэдэв ба санал зөрөлдөөн
Трампын засаг захиргаа ОХУ-д Украиныг Европын холбоонд элсүүлэх болон барууны аюулгүй байдлын баталгааг хүлээн зөвшөөрүүлэх санал тавьж магадгүй гэх таамаг бий. Гэвч Кремлийн зүгээс эдгээр асуудлаар одоогоор ямар нэгэн нааштай хариу өгөөгүй байгаа нь хэлэлцээ хүндхэн болохыг илтгэж байна.
Өнгөрсөн долоо хоногт Берлинд болсон уулзалтыг Стив Уиткофф «ахиц дэвшилтэй» гэж тодорхойлсон ч Украины Ерөнхийлөгч В.Зеленский нутаг дэвсгэрийн бүрэн бүтэн байдлын асуудлаар Вашингтонтой нэгдсэн тохиролцоонд хүрээгүй байгааг мэдэгдсэн. Үүнтэй зэрэгцэн «Axios» агентлагийн мэдээлснээр, энэ амралтын өдрүүдэд Майамид Украин, АНУ-ын цэргийн албаныхны тусдаа хэлэлцээ мөн зохион байгуулагдах аж.
