К-попын гайхамшигт дуу хоолойтой дуучин Ailee нөхрийн хамт Монгол Улсад хүрэлцэн ирлээ. Тэрбээр маргааш буюу 2025 оны 6-р сарын 25-нд Төв цэнгэлдэх хүрээлэнд зохиогдох «Super Concert» тоглолтын гол уран бүтээлчдийн нэг юм. Уг тоглолтод түүнээс гадна алдарт Big Bang хамтлагийн гишүүн Taeyang оролцох юм.
Энэхүү арга хэмжээ нь Монгол Улс болон Бүгд Найрамдах Солонгос Улсын хооронд дипломат харилцаа тогтоосны 35 жилийн ойн хүрээнд зохион байгуулагдаж буй бөгөөд олон улсын хэмжээний, А зэрэглэлийн уран бүтээлчийг эх орондоо хүлээн авч буй нь Монгол-Солонгосын соёлын хамтын ажиллагааны түүхэнд онцгой үйл явдал болон бичигдэж байна.
“Super Concert 2025” тоглолтын ач холбогдол:
- Энэ тоглолт зөвхөн хөгжмийн шоу биш, харин:
- Монгол-Солонгосын соёлын уялдаа холбоог бататгах
- Олон улсын хамтын ажиллагааг өргөжүүлэх
- Энтертайнмент салбарын хүний нөөцийн чадавхыг нэмэгдүүлэх
- Монголын продакшн, зохион байгуулалтын түвшинг харуулах зорилготой
Мөн тоглолтыг амжилттай зохион байгуулах нь Монгол Улсын энтертайнмент салбар олон улсын тавцанд гарч чадахүйц болсны илэрхийлэл болно. Энэ нь соёлын бүтээлч үйлдвэрлэл болон аялал жуулчлалын салбарт эерэг нөлөө үзүүлж, дэлхийн хэмжээний уран бүтээлчид, продакшн багуудтай хамтран ажиллах шинэ боломжуудыг нээж байна.
Ailee гэж хэн бэ?
Ailee нь хүчирхэг дуу хоолой, тайзны оргилуун эрч хүч, жинхэнэ мэдрэмжээрээ алдартай К-поп дуучин. Тэрбээр “Heaven”, “I Will Show You”, “U&I” зэрэг хит дуунуудаараа олон мянган фэнүүдийн сэтгэлд хүрч чадсан уран бүтээлч юм. Түүний амьд тоглолтууд хэзээд хүчтэй, сэтгэл хөдлөлөөр дүүрэн байдаг гэдгээрээ алдартай.
