Америкийн Огайо мужид нэгэн хэрэм шилэн кабелийн шугамыг мэрснээс үүдэж, харилцаа холбооны сүлжээнд томоохон саатал гарсан байна.
Medee.news агентлаг UPI-аас иш татан мэдээлснээр, уг хэрэм тус тойргийн төрийн байгууллагууд, тэр дундаа Прокурорын газрын утас болон интернэт холболтыг таслахад хүргэжээ. Орон нутгийн удирдлагууд эхэндээ энэхүү саатлыг газар доорх кабелийг зам засварын гүйцэтгэгчид санамсаргүй байдлаар гэмтээсэн хэмээн таамаглаж байсан юм.
Гэвч тойргийн захиргааны ажилтан Мэтт Спрингер комиссаруудын хуралдааны үеэр мөрдөн шалгалтын өөр дүнг танилцууллаа. Түүний хэлснээр, нэгэн хэрэм шилэн кабелийн сүлжээний дэд бүтэц дотор үүр засаж, хэд хэдэн шугамыг мэрж гэмтээсэн болох нь тогтоогджээ.
“Ийм зүйл болно гэж санаанд ч орсонгүй” хэмээн Спрингер үүссэн нөхцөл байдалд тайлбар хийхдээ онцолсон байна.
Орон нутгийн удирдлагууд интернэт болон харилцаа холбооны үйлчилгээ үзүүлэгч компаниудтай хамтран ирээдүйд ийм төрлийн хэрэг явдлаас урьдчилан сэргийлэх арга хэмжээ авч эхэлснээ мэдэгдлээ.
