Table of Contents
Өчигдөр Вашингтонд болсон АНУ болон Өмнөд Африкийн Бүгд Найрамдах Улсын (ӨАБНУ) төрийн тэргүүнүүдийн уулзалт хурц уур амьсгалтай болж өндөрлөлөө. Цагаан ордонд болсон албан уулзалтаар Ерөнхийлөгч Дональд Трамп болон Ерөнхийлөгч Сирил Рамафоза нарын хооронд ӨАБНУ-д цагаан арьст фермерүүдийн эсрэг үйлдэгдэж буй хүчирхийллийн асуудлаар ширүүн маргаан өрнөв.
Уулзалт эхлэхээс маргаан үүсэв
Ерөнхийлөгч Трамп уулзалтын эхэнд Рамафозад үг хэлэх боломж олголгүйгээр ӨАБНУ-ын Засгийн газрыг цагаан арьстнуудыг ялгаварлан гадуурхаж байна хэмээн шууд шүүмжилжээ. Тэрбээр энэ талаарх бичлэг, нотлох баримтыг дэлгэцээр үзүүлсэн байна.
“Цагаан арьстан фермерүүд Өмнөд Африкаас дүрвэж буйг харахад маш харамсалтай байна. Гэхдээ та үүнийг дэмждэггүйг би мэдэж байна. Тиймээс үүнийг хамтдаа тайлбарлаж чадах болов уу гэж найдаж байна” хэмээн Трамп мэдэгдсэн байна.
Рамафозагийн хариу мэдэгдэл
Уулзалтын үеэр яриагаа удаа дараа таслуулахад хүрсэн Ерөнхийлөгч Рамафоза:
“Асуудал бүрд хэлэлцээрийн ширээний ард суухыг Нелсон Мандела бидэнд сургасан. Энэ бол бидний ярилцмаар байгаа асуудал мөн” хэмээн уриалга гаргасан байна.
Хоёр орны харилцаанд үүссэн хямрал
Трампын хоёр дахь бүрэн эрхийн хугацаа эхэлмэгц АНУ–ӨАБНУ-ын харилцаа мэдэгдэхүйц муудсан. Энэ байдалд ӨАБНУ-д төрсөн тэрбумтан Илон Маскийн нөлөө байгаа гэж зарим ажиглагчид үзэж байна. Тэрбээр тус улсын цагаан арьст иргэдийн эрх зөрчигдөж буй талаар олон нийтэд байнга шүүмжлэлтэй ханддаг.
АНУ-ын дараалсан хориг арга хэмжээнүүд
Сүүлийн саруудад АНУ дараах арга хэмжээнүүдийг авчээ:
- ӨАБНУ-ын цагаан арьст иргэдэд дүрвэгчийн статус олгох шийдвэр гаргасан
- ӨАБНУ-д үзүүлдэг тусламжийг танах
- Өмнөд Африкаас орж ирдэг бараанд 31 хувийн импортын татвар ногдуулсан
- АНУ-д суугаа ӨАБНУ-ын элчин сайдыг нутаг буцаасан
Рамафозагийн дипломат бэлэг
Сирил Рамафоза хоёр орны харилцааг сэргээх зорилгоор:
- ӨАБНУ-ын шилдэг хоёр гольфч
- Хамгийн баян тэрбумтан
- Starlink үйлчилгээг нутагтаа нэвтрүүлэх зөвшөөрөл зэрэг дипломат “бэлэгтэй” иржээ.
Газар өмчлөл — маргааны гол үндэс
Маргааны гол шалтгаан бол ӨАБНУ-ын эрх баригчдын баталсан шинэ газар өмчлөлийн хууль юм. Тус улс газар тариалангийн талбайн дийлэнх хувийг эзэмшдэг цөөнх болох цагаан арьст иргэдийн өмчийг тэгшитгэх бодлого баримталж байгаа нь Трампыг хүчтэй эсэргүүцэхэд хүргэжээ.
Өмнөд Африкийн засаг захиргаа харин үүнийг няцааж, тус улсад хүн амины хэргийн гол хохирогчид хот суурин газрын хар арьст залуус байдаг талаар статистик мэдээлэлтэйгээр хариу өгчээ.
