Чөлөөт бөхийн сонирхогчдыг догдлуулсан нэгэн томоохон барилдаан болох гэж байна. Дональд Трампын засаглал эхэлснээс хойш яригдаж эхэлсэн АНУ, ОХУ-ын спортын халз тулаануудын анхны нь чөлөөт бөхийн барилдаан болж тодорлоо.
ОХУ-ын Спортын сайд Михаил Дегтярёв сэтгүүлчдэд мэдээлэхдээ:
“Чөлөөт бөхийн халз барилдааныг долдугаар эсвэл наймдугаар сард зохион байгуулахаар төлөвлөсөн. Дэлхийн бөхийн нэгдсэн холбоо (ДБНХ) болон АНУ-ын Бөхийн холбоотой тохиролцоонд хүрсэн. Ойрын хугацаанд барилдааны тов, байршлыг эцэслэнэ. Спортын бусад төрлийн хэлэлцээ дөнгөж эхэлж байна” гэж мэдэгджээ.
ОХУ-ын Спорт бөхийн холбооны тэргүүн Михаил Мамиашвили мөн дараах тайлбарыг өгсөн байна:
- “Манай багийн хувьд Америкийн виз авах хамгийн том хүндрэл болж байна. АНУ-ын Бөхийн холбооноос бүх багийн гишүүдэд виз авахыг хичээж байгаа ч энэ асуудлыг тэд шийдэх боломжгүй. ДБНХ-аас ОХУ-д тэмцээн зохион байгуулах эрх олгоогүй тул гадаад оронд барилдаан хийхээс өөр сонголтгүй байна” гэлээ.
Мамиашвили цааш нь:
“Уран гулгалт, гимнастикийн төрөлд орос тамирчдыг оролцуулахгүй хэвээр байгаа ч бид ДБНХ-той үргэлжлүүлэн хамтран ажиллаж байна. Узбекистан, Азербайжан, Казахстан улс барилдааныг хүлээн авах боломжтой гэж мэдэгдсэн. Манай холбоо Узбекистаныг сонгохоор төлөвлөж байна. Сонгон шалгаруулалтыг үндэслэн зөвхөн шилдгүүдийг оролцуулна. Барилдааныг долдугаар сарын сүүлчээр хийх нь хамгийн тохиромжтой хувилбар гэж үзэж байна. Шагналын сан өндөр байх болно” гэж онцолжээ.
Ийнхүү АНУ, ОХУ-ын шигшээ багийн чөлөөт бөхийн шилдгүүд ойрын саруудад олон улсын дэвжээнд халз тулна.
2 comments
Улс төрийн нөхцөл байдал хурцадсан үед ч спорт хүмүүсийг нэгтгэдэг нь сайн хэрэг
Ийм уулзалтууд нь спортыг хөгжүүлэх, залуучуудыг бөхийн спортоор хичээллэхэд түлхэц болдог