АНУ-ын Эрүүл мэндийн сайд Роберт Кеннеди-жуниор тус улсын удирдагч Дональд Трампын хооллолтын буруу зуршлын талаар мэдээлж, түүнийг одоог хүртэл эрүүл саруул байгааг гайхаж буйгаа илэрхийлэв. Medee.news сайтын мэдээлснээр, энэхүү яриа 2026 оны 1-р сарын 14-нд Кэти Миллерийн YouTube сувгаар цацагдсан подкастын үеэр болжээ.
“Тэр McDonalds, чихэр, Diet Coke зэрэг эрүүл мэндэд маш хортой хүнс хэрэглэдэг. Тэр Diet Coke-г байнга уудаг. Түүнд бурханлаг бие махбодь заяасан гэлтэй. Тэр яаж амьд явааг би мэдэхгүй юм, гэхдээ тэр амьд байна” хэмээн Эрүүл мэндийн сайд ярьсан байна. Трампыг зарим аяллынх нь үеэр дагалдаж явсан Кеннеди-жуниор ерөнхийлөгч зам зууртаа түргэн хоол идэхийг илүүд үздэгийг тэмдэглэв. Гэхдээ өдөр тутмын амьдралдаа зөв, эрүүл хоол хүнс хэрэглэдэг болохыг тэрээр нэмж дурджээ.
Трамп яагаад түргэн хоол сонгодог вэ?
Сайдын тайлбарласнаар, АНУ-ын удирдагч аяллын үеэр томоохон корпорацуудын бүтээгдэхүүнийг сонгодог нь тодорхой шалтгаантай аж: Тэрээр томоохон сүлжээ газруудад илүү итгэдэг бөгөөд аяллын үеэр хоолны хордлого авч өвдөхийг хүсдэггүй тул ийм сонголт хийдэг байна.
