Table of Contents
Г.Ганчимэг
Австралийн Тасмани мужийн Инкат компани байгаль орчинд ээлтэй тээврийн салбарт томоохон дэвшил авчирсан цахилгаан хөдөлгүүртэй хамгийн том усан онгоцыг үйлдвэрлэн олон нийтэд танилцуулжээ.
Цахилгаан хөлгийн шинэ үе: Hull 096
Hull 096 нэртэй энэхүү хөлөг нь Өмнөд Америкийн Букуэбус усан тээврийн оператор компанитай хамтран ажиллах гэрээний дагуу бүтээгдсэн бөгөөд Аргентин улсын нийслэл Буэнос-Айрес болон Уругвайн хооронд зорчигч тээвэрлэх зориулалттай.
Хобарт хотод өнөөдөр олон нийтэд танилцуулсан Hull 096:
- Нийт урт: 130 метр
- Зорчигч багтаамж: 2100 хүн
- Тээврийн хэрэгсэл: 225 автомашин
- Зай хураагуурын жин: 250 тонн
- Эрчим хүчний хүчин чадал: 40 мегаватт цаг
Энэ бол зөвхөн усан онгоц төдийгүй дэлхийн хамгийн том цахилгаан хөдөлгүүртэй тээврийн хэрэгсэл юм.
Байгальд ээлтэй технологийн чухал алхам
Инкат компанийн захирал Роберт Клиффорд:
“Бид 40 гаруй жилийн турш дэлхийн хамгийн шилдэг хөлөг онгоцыг үйлдвэрлэж ирсэн. Hull 096 бол манай компанийн хамгийн ихээр төлөвлөж, зорилт тавьсан, өндөр хүлээлттэй төсөл юм” гэж онцоллоо.
Мөн тэрбээр цаашид байгальд ээлтэй ижил төрлийн хөлгүүдийг үйлдвэрлэж, зөвхөн Австралид төдийгүй дэлхийн зах зээлд нийлүүлэх зорилготой байгаагаа илэрхийлэв.
Усан тээврийн салбарын ногоон хувьсгал
НҮБ-ын Худалдаа, хөгжлийн бага хурлын мэдээлснээр, усан тээвэр нь дэлхийн нийт дулаан ялгаруулалтын 3 хувийг бүрдүүлдэг. Инкат компанийн цахилгаан хөдөлгүүртэй усан онгоцнууд энэ үзүүлэлтийг бууруулахад чухал хувь нэмэр оруулах юм.
Hull 096 төслийг мэргэжилтнүүд байгаль орчны нөхцөл байдалд ээлтэй, усан тээврийн ирээдүйд шинэ эрин үе нээсэн алхам гэж үнэлж байна.
