Биткоины ханш 100 мянган доллароос давж өсөлтийн дохио өглөө

АНУ болон Их Британийн хооронд шинэ худалдааны гэрээ байгуулагдсаны дараа криптовалютын зах зээл дахин идэвхжиж, биткоины ханш хоёрдугаар сараас хойш анх удаа 100 мянган ам.долларын босгыг давлаа. Ерөнхийлөгч Дональд Трампын эхлүүлсэн худалдааны дайн намжих хүлээлт үүссэн нь энэ өсөлтийн гол шалтгаан хэмээн шинжээчид дүгнэж байна.

Пүрэв гаргийн үд дунд биткоин 101,329.97 ам.доллараар арилжаалагдаж, тухайн өдрийн эхний ханшаасаа 4.7 хувиар өссөн байна. Энэ нь биткоины нэгдүгээр сард тогтоосон түүхэн дээд үнэ болох 109 мянган ам.доллароос доогуур хэвээр байгаа ч ханш эргэн сэргэж байгааг илтгэж байна. Үүнтэй зэрэгцэн эфириумийн ханш мөн 14 хувиар нэмэгдэж, 2,050.46 ам.долларт хүрчээ.

Ерөнхийлөгч Трамп болон Их Британийн Ерөнхий сайд Кир Стармер нар шинэ худалдааны хэлэлцээрийн хүрээнд Америкт орж ирэх Британийн бараанд 10 хувийн татвар тогтоохоор болсон бол Их Британи Америкийн бүтээгдэхүүнд ногдуулж байсан татвараа 5.1 хувиас 1.8 хувь болгон бууруулахаар тохиролцсон байна. Энэ нь Трамп Цагаан ордонд эргэн ирсэнээс хойш байгуулсан анхны худалдааны гэрээ болж буй бөгөөд дэлхийн худалдааны маргааныг намжаах дохио хэмээн үзэж болно.

Хэдийгээр Трамп криптовалютыг дэмжих байр сууриа илэрхийлж байсан ч бодит шинэчлэлүүдийн хэрэгжилт удааширсан нь арилжаалагчдын сэтгэл дундуур байдлыг нэмэгдүүлж, хоёрдугаар сараас дөрөвдүгээр сар хүртэлх хугацаанд биткоин болон бусад токенуудын ханш огцом унахад хүргэсэн. Ялангуяа дөрөвдүгээр сард Ерөнхийлөгч өргөн хүрээтэй гаалийн тариф зарласнаар криптовалютын үнэ хувьцаа болон бусад эрсдэл өндөртэй хөрөнгөтэй ижил хэлбэлзэлтэй болж, буурсан юм.