Table of Contents
Өмнөд Солонгосын алдарт К-поп хамтлаг “Blackpink” гурван жилийн дараах анхны шинэ цомгийнхоо бэлтгэлийг эрчимжүүлж, энэ долоо хоногт шинэ дууны клипний зураг авалтаа эхлүүлэхээр төлөвлөж байна гэж тус хамтлагийн менежментийг хариуцдаг YG Энтертайнмент мэдээллээ.
Шинэ дууны клипний зураг авалт эхэлнэ
YG-ийн мэдэгдэлд:
“Хамтлагийн гишүүд болон продакшны багийнхан зураг авалтыг амжилттай хийхийн тулд чадах бүхнээ дайчилж байна. Энэ долоо хоногт ‘Blackpink’-ийн шинэ дууны клипний зураг авалт албан ёсоор эхэлнэ.”
гэжээ.
Гурван жилийн дараах шинэ цомог
Шинэ цомог нь “Blackpink”-ийн 2022 онд гаргасан “Born Pink” нэртэй хоёр дахь бүрэн хэмжээний цомгоос хойших анхны томоохон уран бүтээл болох юм.
Цомгийн ажил эцсийн шатандаа орсон бөгөөд хамтлаг хөгжмийн чанар, бүтээлийн агуулгад онцгой анхаарч буйгаа илэрхийлжээ.
YG Энтертайнмент мөн дараах мэдэгдлийг гаргасан байна:
“’BLACKPINK’-ийнхнийг дахин уран бүтээлээ туурвиж эхлэхийг тэсэн ядан хүлээж байсан шүтэн бишрэгчдэдээ чин сэтгэлээсээ талархаж байна. Цомгийн ажил дуусах шатандаа явж байгаа бөгөөд бид ойрын хугацаанд илүү сайхан мэдээг хуваалцах болно.”
Дэлхийн хэмжээний аялан тоглолт үргэлжилж байна
“Blackpink” хамтлаг одоогоор “Deadline” нэртэй дэлхийг тойрох аялан тоглолтоо хийж байгаа бөгөөд энэ нь Өмнөд Солонгосын Гоянг хотод эхэлжээ.
Тэд энэ оны наймдугаар сард Лондоны алдарт Уэмбли цэнгэлдэх хүрээлэнд бие даасан тоглолтоо хийж, тус танхимд тоглосон анхны К-поп охидын хамтлаг болсон түүхэн амжилтыг байгуулсан юм.
