БНСУ-ын Ерөнхий сайд асан Хан Дог Сү өчигдөр Ерөнхий сайд болон Ерөнхийлөгчийн үүргийг түр орлон гүйцэтгэгчийн албан тушаалаасаа чөлөөлөгдөж байгаагаа олон нийтэд зарлалаа. Энэ алхам нь түүнийг удахгүй болох Ерөнхийлөгчийн сонгуульд өрсөлдөх бэлтгэлээ хангаж байгааг баталж байна.
Хан Дог Сү:
“Миний өмнө хоёр зам байсан. Нэг нь одоогийн үүрэгт ажлаа үргэлжлүүлэх. Нөгөө нь ажлаасаа огцроод илүү агуу үүрэг хариуцлагыг биелүүлэх” хэмээн мэдэгдэж байв.
Таамаглалын дагуу тэрээр өнөөдөр Ерөнхийлөгчийн сонгуульд нэр дэвшихээ албан ёсоор зарлаж, ард түмний итгэл, сонголтыг хүлээхийн тулд бүхнээ зориулна гэдгээ илэрхийллээ. “Миний хайртай БНСУ-ын ирээдүй, бид бүгдийн төлөө чадах бүхнээ хийхээр шийдсэн” гэж тэр хэлэв.
Хан Дог Сү Ард түмний хүч намаас нэр дэвших бөгөөд энэ намын Ерөнхийлөгч Юн Сок Ёл өнгөрсөн арванхоёрдугаар сард дайны онц байдал зарласнаас хойш улс төрийн томоохон хэлэлцүүлэгт төвд байсаар ирсэн. Юн Сок Ёл-ыг бүрэн эрхээс нь түдгэлзүүлж, мөн Хан Дог Сү-гийн эрхийг түр хугацаанд хязгаарласан ч Үндсэн хуулийн шүүх эцэст нь эрхийг нь сэргээжээ.
Сөрөг хүчний Ардчилсан намаас нэр дэвших төлөвтэй И Жэ Мён-ы сонгуулийн хууль зөрчөөгүй гэх доод шатны шүүхийн шийдвэрийг дээд шүүх шалгаж эхэлсэн бөгөөд үүний улмаас түүний нэр дэвших эрх цуцлагдах магадлалтай байна. Хэдий тийм боловч олон нийтийн санал асуулгаар Жэ Мён 38 хувийн дэмжлэгтэйгээр тэргүүлж байгаа юм.
Ирэх долоо хоногт Ерөнхийлөгчийн сонгуульд нэр дэвшигчдийн бүрэн жагсаалтыг зарлах юм байна.
Хан Дог Сү улс төрийн салбарт 50 орчим жил ажилласан туршлагатай эдийн засагч мэргэжилтэй нэгэн. Тэрээр 2007-2008 онд БНСУ-ын 38 дахь Ерөнхий сайдаар ажиллаж, 2022 оны тавдугаар сарын 21-нд 48 дахь Ерөнхий сайдаар дахин томилогдож байжээ.
2 comments
Таван жил биш гурван жил гэдэг бол ер бусын шийдвэр. Магадгүй энэ нь шаардлагатай шинэчлэлийг илүү хурдан хэрэгжүүлэхэд тусална
Хан Деок Сү ерөнхийлөгчийн эрх мэдлийг үнэхээр багасгаж чадах болов уу гэж би бодож байна. Энэ нь ардчилалд сайн хэрэг болно