Улаанбаатар хотын төв хэсэгт байрлах Улсын Их Дэлгүүр (УИД)-ийн орчимд автомашины хэт ачаалал, явган зорчигчийн тав тухыг алдагдуулж буй асуудал олон нийтийн анхаарлыг татсаар байна. Энэхүү хүндрэлтэй нөхцөл байдлыг шийдэх үүднээс Улаанбаатар хотын ерөнхий архитектор Ч.Төгсдэлгэр томоохон шийдэл танилцууллаа.
Түүний хэлснээр, УИД-ийн баруун талд байрлах 1,400 орчим м.кв нийтийн эзэмшлийн талбайд автомашинууд төлбөргүй байрлаж байгаа нь тухайн бүсийн замын ачааллыг нэмэгдүүлж, явган хүний замыг хааж байгааг тодотгов.
Хот төлөвлөлтийн шинэ шийдэл:
- Далд зогсоол барина: Их багтаамжтай, газар доорх төлбөртэй авто зогсоол барих боломж байгааг тодорхойлсон байна.
- Хувийн хэвшилтэй хамтарна: Хотын зүгээс архитектор төлөвлөлтийн даалгаврыг гаргаж, нээлттэй тендер зарлах бөгөөд төслийг хувийн хэвшилтэй хамтран хэрэгжүүлэхээр төлөвлөжээ.
- Худалдаа, үйлчилгээний талбай: Далд зогсоолын 20-30 хувийг ашигтай байлгах үүднээс худалдаа, үйлчилгээний зориулалтаар ашиглах боломжийг бүрдүүлнэ.
- Төлбөртэй байхаар тусгасан: Зогсоолын ашиглалт нь төлбөртэй байх бөгөөд уг орлого нь тухайн бүсийн зам, орчны тохижилтод зориулагдах юм.
Ч.Төгсдэлгэр онцолж хэлэхдээ:
“Улсын Их Дэлгүүр орчимд авто зогсоолын хүртээмж мууг хэн бүхэн мэднэ… Далд зогсоол барьснаар оршин суугчид болон явган зорчигчдын ая тухтай байдал хангагдах юм.”
Энэхүү санаачилга хэрэгжсэнээр хотын төв дэх авто зогсоолын хүртээмжийг сайжруулж, замын хөдөлгөөний ачааллыг бууруулах, явган хүний тав тухыг нэмэгдүүлэх бодит шийдэл болохоор байна.
