Цахим орчинд үйлдэгдэж буй луйврын гэмт хэрэг улам нарийн төвөгтэй болж, иргэд санхүүгээрээ хохирсоор байна. Саяхан нэгэн иргэн “Хаан банкны урамшуулал” нэртэй хуурамч холбоос дээр дарсны улмаас данснаасаа 27.5 сая төгрөгөө алдсан хэрэг бүртгэгдлээ. Хохирогч Ц нь цахим зар сурталчилгаанд итгэж, өөрийн гар утсанд ирсэн нууц кодыг бусдад дамжуулснаар зургаан удаагийн гүйлгээгээр бүх мөнгөө алдсан байна.
Өнгөрсөн 2025 оны статистик мэдээллээр нийт залилангийн хэргийн дийлэнх буюу 80 гаруй хувь нь интернэт орчинд үйлдэгдсэн байна. Тодруулбал, 12 мянга гаруй иргэн цахим халдлагад өртөж, эд хөрөнгөөрөө хохирсон гэсэн албан ёсны дүн гарчээ. Хохирогчдын насны бүтцийг авч үзвэл 25-аас 44 насны залуус болон дунд насныхан хамгийн ихээр өртөж байгаа бөгөөд тэдний талаас илүү хувь нь хувийн хэвшилд ажилладаг иргэд байна.
Сүүлийн үед сошиал сувгуудаар “Хусаад хож” гэх мэт шууд дамжуулалт ашиглан иргэдийг төөрөгдүүлэх арга газар авч байна. Залилагчид хуурамч дансны гүйлгээ харуулж итгэл төрүүлснийхээ дараа “хонжворын 10 хувийг урьдчилж төлбөл мөнгө чинь орно” гэх шалтаг хэлж мөнгө салгадаг байна. Энэ мэтчилэн сайхан амлалт бүхий мэдээллийн цаана санхүүгийн асар их эрсдэл нуугдаж байдгийг цагдаагийн байгууллагаас анхааруулсаар байна.
Цахим халдлагаас өөрийгөө болон ойр дотны хүмүүсээ хамгаалахын тулд дараах дүрмийг мөрдөж хэвшээрэй. Үүнд:
- Фейсбүүк, Инстаграм болон Телеграм платформоор ирсэн баталгаагүй линк дээр огт дарахгүй байх.
- Банкны аппликейшны нэвтрэх нэр, нууц үг болон картын ар талын CVV кодыг хэнд ч хэлэхгүй байх.
- Гар утсанд ирсэн нэг удаагийн баталгаажуулах кодыг бусдад дамжуулахгүй байх.
- Хэт өндөр хонжвор амласан сугалаа, лайв болон сэжигтэй зар сурталчилгаанд шүүмжлэлтэй хандах.
Хэрэв та сэжигтэй тохиолдолтой таарсан бол цаг алдалгүй цагдаагийн байгууллагад мэдэгдэж, банкны картаа хаалгах шаардлагатай. Сонор сэрэмжтэй байх нь таны санхүүгийн аюулгүй байдлыг хангах хамгийн найдвартай арга юм.
