АНУ-ын Ерөнхийлөгч Дональд Трамп Кубыг “өөрийн болгох” нэр төртэй гавьяаг өөртөө хамаатуулна гэж үзэж байгаагаа илэрхийллээ.
Medee.news агентлагийн мэдээлснээр, тэрээр Цагаан ордны Зууван танхимд ядуу иргэдэд тусламж үзүүлэх улсын хөтөлбөрүүдийн хэрэгжилт дэх залилан мэхлэлттэй тэмцэх арга хэмжээг чангатгах тухай зарлигт гарын үсэг зурсныхаа дараа сэтгүүлчдийн асуултад хариулахдаа ийнхүү мэдэгджээ.
“Би Кубыг өөрийн болгох гавьяаг хүртэнэ гэдэгтээ үнэхээр итгэж байна. Энэ нь сайн хэрэг байх болно. Том нэр төр” хэмээн АНУ-ын удирдагч баталжээ. Түүнээс “Кубыг өөрийн болгох” гэж үнэхээр хэлж байгаа эсэхийг лавлахад тэрээр “Тийм ээ, ямар нэг байдлаар” гэж хариулсан байна. “Би үүнийг чөлөөлөх үү, эсвэл өөрийн болгох уу гэдэг нь хамаагүй. Хэрэв үнэнийг мэдэхийг хүсвэл, би тэр улстай юу хүссэнээ хийж чадна” гэж Трамп нэмж хэлэв.
Тэрээр АНУ Кубын асуудлыг шийдвэрлэхдээ Венесуэл эсвэл Ираны хувилбарын аль нэгийг баримтлах эсэх талаар тодорхой хариулт өгөхөөс татгалзлаа. “Би танд үүнийг хэлж чадахгүй. Гэхдээ тэд (Гаванагийн эрх баригчид) бидэнтэй хэлэлцээ хийж байгаа гэдгийг хэлж чадна” хэмээн тэрээр тэмдэглэсэн байна.
Кубын Ерөнхийлөгч Мигель Диас-Канель 3-р сарын 13-нд мэдээлснээр, Гавана болон Вашингтон хоёр талын маргаантай асуудлуудыг яриа хэлэлцээний замаар шийдвэрлэх гарц хайхад чиглэсэн хэлэлцээ хийсэн байна. Тэрээр энэхүү яриа хэлэлцээний зорилго нь шийдвэрлэх шаардлагатай асуудлуудыг тодорхойлох, хоёр орны ард түмний эрх ашгийн төлөө бодит алхам хийхэд бэлэн байгаа эсэхээ бататгах, аюулгүй байдал, энх тайвныг хангахад хамтран ажиллах салбаруудыг тогтоох явдал гэдгийг онцолжээ. Куба улс энэхүү үйл явцыг хоёр улсын улс төрийн тогтолцоо, бүрэн эрхт байдал болон өөрөө засан тохинох эрхийг харилцан хүндэтгэх, тэгш эрхийн үндсэн дээр үргэлжлүүлэхэд бэлэн байгаагаа илэрхийлсэн байна.
