АНУ-ын консерватив хөдөлгөөний нэртэй идэвхтэн, Ерөнхийлөгч Дональд Трампын дэмжигч Чарли Кирк Юта мужийн “Utah Valley University” их сургуулийн оюутны хотхонд болсон цуглааны үеэр буудуулсны улмаас амиа алджээ.
Ч.Кирк нь Америкийн консерватив үзэл сурталд нөлөө бүхий дүрийн нэг бөгөөд улс даяар их, дээд сургуулиудад залуучуудтай уулзалт, мэтгэлцээн зохион байгуулж ирсэн нь түүнийг олон нийтэд сайн таниулсан.
Дональд Трамп уг үйл явдалд хариу мэдэгдэл хийхдээ:
“Агуу бөгөөд домогт Чарли Кирк нас барлаа. Америкийн Нэгдсэн Улс дахь залуучуудын зүрх сэтгэлийг Чарлигаас илүү сайн ойлгодог хүн байхгүй” гэж хэлжээ.
Ч.Кирк 18 настайдаа “Turning Point USA” нэртэй консерватив бүлгийг байгуулж, улмаар Трамп болон түүний гэр бүлийн хүрээнд ойр дотно харилцаатай болжээ. Цагдаа нарын мэдээлснээр, хувийн хамгаалалтын алба шархадсан Киркийг эмнэлэгт хүргэсэн ч биеийн байдлын улмаас амьсгал хураасан байна.
Холбооны мөрдөх товчооны захирал Каш Пателийн мэдээлснээр, сэжигтнийг дээвэр дээрээс буудлага хийсэн гэж урьдчилсан дүгнэлт гаргаад байна. Хэрэг гарсны дараа нэг иргэнийг баривчилсан боловч түүнийг халдлагад холбоогүй болохыг тогтоосны дараа сулласан байна. Гэсэн ч уг иргэнийг мөрдөн шалгах ажиллагаанд саад учруулсан хэмээн яллах боломжийг хууль сахиулах байгууллагууд хэлжээ. Үндсэн гэмт этгээдийг эрэн сурвалжлах ажиллагаа одоогоор үргэлжилж байна.
