Дорноговь аймаг үүсэн байгуулагдсаны 94 жилийн ой, Сайншанд сумын 64 жилийн ойн хүрээнд зохион байгуулагдаж буй Ноён хутагт Дулдуйтын Данзанравжаагийн мэлмий гийсний 222 жилийн ой, Говийн бүсийн Даншиг наадмын нээлт ёслол төгөлдөр болж байна. Тус ойн арга хэмжээг энэ сарын 31-нийг дуустал өргөн цар хүрээтэйгээр тэмдэглэх бөгөөд уламжлалт спортын төрөл, соёлын онцлог арга хэмжээнүүдээр баялаг болж байна.
Наадмын үеэр хүчит бөхийн барилдаан, сур харваа, шагайн харваа, мөн 10 насны морьдын уралдаан зэрэг үндэсний спортын төрөл бүрийн тэмцээн уралдаан зохион байгуулагдаж байна. Үндэсний бөхийн барилдаанд улсын арслангууд Ц.Содномдорж, Э.Оюунболд, Ц.Бямба-Отгон, Р.Пүрэвдавга, улсын гарди Ш.Жаргалсайхан тэргүүтэй 128 бөх зодоглож, наадамчин олныг баясгаж байна.
Онцлох нэгэн үйл явдал нь Нэгдсэн Үндэстний Байгууллагын Ерөнхий Ассамблейн 79 дүгээр чуулганаас долдугаар сарын 11-нийг жил бүрийн “Адууны өдөр” болгон зарласантай холбогдуулан “Морьтны соёл” бэсрэг наадам зохион байгуулагдаж байгаа явдал юм. Уг арга хэмжээний хүрээнд:
- “Хос морьтой сайхан хос”
- “Жороо морь”
- “Могжоохон даагатай жогжоохон хүү”
гэдэг уралдаан тэмцээнүүдийг явуулж, морьтны өв соёлыг түгээн дэлгэрүүлж байгаагаараа энэ жилийн наадам онцлог болж байна.
