Дональд Трамп: АНУ Израиль-Ираны мөргөлдөөнд оролцож ч магадгүй, эсвэл үгүй ч байж мэднэ

Израиль ба Ираны хоорондын хурцадмал байдал дэлхий дахины анхаарлыг татаж буй энэ үед АНУ-ын ерөнхийлөгч Дональд Трамп энэ асуудлаар тодорхой бус байр суурь илэрхийлсээр байна.

Сүүлийн зургаан өдрийн турш хоёр улс агаарын довтолгоо хийж, мөргөлдөөн улам хурцдаж буй ч АНУ-ын оролцооны талаар Трамп яг таг хариу өгөлгүй, нууцлаг мэдэгдлүүд хийжээ.

Тэрбээр Цагаан ордны хашаанд болсон хоёр том тугийн шонгийн нээлтийн үеэр “Би үүнийг хийх эсэхийг та нар мэдэж чадахгүй. Би хийж магадгүй. Хийхгүй ч байж магадгүй. Намайг юу хийх гэж байгааг хэн ч мэдэхгүй. Миний хэлж чадах зүйл бол: Иран маш их асуудал тарьж байгаа. Тэд бидэнтэй хэлэлцээр хийхийг хүсэж байна” хэмээн сэтгүүлчдэд хэлсэн байна.

Хөлбөмбөгийн Ювентус багийн тоглогчидтой хамт зургаа авахуулах үеэрээ тэр дахин Ираны асуудлыг дурдсан бөгөөд:
“Надад юу хийх талаар төлөвлөгөө байгаа. Гэхдээ би эцсийн шийдвэрээ гаргаагүй байна. Би эцсийн шийдвэрээ нэг секундийн өмнө гаргах дуртай. Яагаад гэдгийг мэдэж байна уу? Учир нь бүх зүйл, ялангуяа дайн дажин байнга өөрчлөгдөж байдаг. Нэг туйлаас нөгөө туйл руу шилжиж байдаг юм” гэж мэдэгджээ.

Энэхүү байр суурь нь Ираны дэглэмийг унагахад АНУ оролцох ёстой эсэх талаар Трампын багт ч санал зөрөлдөөн байгааг харуулж байна. Зарим хууль тогтоогчид түүний гадаад оролцоог хязгаарлах хууль санаачлаад буй.

АНУ-ын улс төрийн тоймч Такер Карлсон, сенатор Тэд Круз нар ч энэ талаар санал зөрөлджээ. Карлсон хилийн чанад дахь өртөг өндөртэй дайнд оролцох шаардлагагүй гэж үзэж байхад, Круз АНУ Иранд цэргээ илгээхгүй ч, стратегийн цохилт өгөх “бункер дэлбэлэгч” бөмбөг ашиглах боломжтой гэжээ.

13,600 кг жинтэй “Massive Ordinance Penetrator” нэртэй энэхүү бөмбөгийг АНУ өмнө нь зөвхөн туршилтад ашиглаж байсан. Крузын хэлснээр, энэ зэвсгийг Ираны уулын дор орших Фордогийн цөмийн байгууламжийг устгахад хэрэглэх магадлал бий.

Трамп мөн “Нөхцөл болзолгүйгээр үг дуугүй бууж өг. Би дахиж хэлэхгүй. Үгүй бол бид тэнд байгаа бүх цөмийн байгууламжийг дэлбэлэх болно” хэмээн мэдэгдэж, Ираныг хатуу шүүмжилсэн байна. Тэр Ираныг 40 жилийн турш АНУ, Израильд заналхийлж ирсэн гэж үздэгээ илэрхийлсэн.

Сүүлд сэтгүүлчидтэй уулзахдаа Трамп дайсагналыг зогсоох ганц зам нь Иран цөмийн зэвсгээсээ бүрэн татгалзах гэж тодотгож:
“Бид гал зогсоохыг хүсэхгүй. Бид бүрэн ялалтыг хүсэж байна. Ялалт гэж юу болохыг мэдэж байна уу? Цөмийн зэвсэггүй болох” гэж хэлсэн байна.