Дугуйн замыг хаана, хэрхэн тавих вэ? – Иргэдийн оролцоотойгоор төлөвлөж байна

Нийслэлийн удирдлагууд дугуй болон цахилгаан скүүтер хэрэглэгчдийн аюулгүй байдлыг сайжруулах зорилгоор энэ онд дөрвөн байршилд нийт 14 км дугуйн зам тавихаар урьдчилсан төлөвлөгөө гаргажээ.

Шинэ дугуйн зам тавигдах байршлууд:

1. Наадам центр – Нийслэл хүрээ өргөн чөлөө: 6.7 км
2. ДЦС-3 – Баянголын уулзвар: 0.6 км
3. Баянмонгол хороолол – Дүнжингаравын уулзвар (I хэсэг): 1.1 км
4. Баянмонгол хороолол – Дүнжингаравын уулзвар (II хэсэг): 5.6 км

Иргэдийн оролцоог чухалчилж байна

Нийслэлийн Хот байгуулалт, хотын стандартын газар дээрх төлөвлөлтүүдийг илүү оновчтой болгохын тулд олон нийтийн саналыг цахимаар авч эхэлжээ. Та тус байгууллагын албан ёсны Facebook хуудас руу хандан саналаа илгээх боломжтой.

Иргэдээс дараах асуултад хариу авч байна:

• Дугуй болон скүүтерээр зорчиход хамгийн их тулгардаг хүндрэл юу вэ?
• Замыг ямар хэлбэрээр, хэрхэн тавивал тохиромжтой вэ?
• Төлөвлөсөн байршлуудаас аль хэсгийн ажлыг түрүүлж эхлүүлэх хэрэгтэй вэ?

“Дугуйн замын сүлжээг хамтдаа бүтээе”

Хотын захиргаанаас “Улаанбаатар хотын дугуйн замын сүлжээг хамтдаа төлөвлөе” уриалгыг дэвшүүлж байгаа бөгөөд иргэдийн санал шийдвэр гаргахад чухал нөлөө үзүүлэх юм.

Хэрэв та дугуй унадаг, скүүтер хэрэглэдэг эсвэл явганаар зорчдог бол энэ боломжийг ашиглан анхаарал хандуулах асуудлаа хуваалцаарай.