Өмнөд Солонгост албан ёсны айлчлал хийж буй Францын ерөнхийлөгч Эммануэл Макрон Пүрэв гарагт хэвлэлийнхэнтэй уулзах үеэрээ АНУ-ын ерөнхийлөгчийн Ираны асуудалд баримталж буй тууштай бус байр суурийг эрс шүүмжиллээ. Тэрбээр Цагаан ордны тэргүүнийг Ойрх Дорнодын хурцадмал байдалд хөнгөн хуумгай хандаж байгааг анхааруулаад, “Нухацтай бай…өдөр бүр ярих хэрэггүй” хэмээн мэдэгдсэн байна.
Францын төрийн тэргүүн зэвсэгт мөргөлдөөний асуудал нь хэний ч амь насаар дэнчин тавьж болохгүй хариуцлагатай сэдэв гэдгийг онцолсон юм. Тэрбээр хэлэхдээ, “Энэ бол шоу биш. Бид дайн, энх тайван, эрэгтэй, эмэгтэй хүмүүсийн үхэл амьдралын тухай ярьж байна. Асуудалд нухацтай хандахыг хүсэж байвал өдөр бүр өмнөх өдөр ярьсныхаа эсрэг зүйл ярих хэрэггүй. Магадгүй өдөр бүр яриад дэмий байх. Зүгээр л байдлыг намжаах хэрэгтэй” хэмээсэн нь Дональд Трампыг чиглэсэн хатуухан сануулга байв.
Түүнчлэн Европын холбоотнууд АНУ-ын бүс нутаг дахь үйл ажиллагааг ерөнхийд нь дэмждэг боловч шууд дайнд татагдан орохоос эрс татгалзаж буйгаа илэрхийлсээр байгаа юм. НАТО-гоос гарах тухай Трампын сүүлийн үеийн мэдэгдэлд Макрон хариу өгөхдөө “НАТО шиг эвсэл гишүүдийнх нь тэр болгон хэлээд байдаггүй итгэлцлийн ачаар үнэ цэнтэй байдаг юм” гэж хэлснээрээ тус байгууллагын амлалтад эргэлзэх нь утгагүй болохыг санууллаа.
Хоёр улсын төрийн тэргүүнүүдийн дунд өрнөж буй шүүмжлэлийн гол гогцоонуудыг тоймловол:
- Дайны оролцоо: АНУ болон Израилийн дангаараа эхлүүлсэн дайны тухайд Макрон “Тэд өөрсдийнхөө шийдвэрээр эхлүүлсэн дайндаа ганцаардаж байгааг одоо харамсан ярьж байна. Энэ бол бидний дайн биш” гэж мэдэгдсэн.
- Хувийн доромжлол: Трамп Лхагва гарагийн үдийн зоогийн үеэр Макроны франц аялга болон гэр бүлийн харилцааг нь элэглэн шоолж, 2025 оны дуулиант бичлэгийг дурдсан байна.
- Дипломат хариу: Трампын хувийн амьдралыг нь оролдсон бүдүүлэг хошигнолд Макрон “Ийм зүйлийн талаар тайлбар өгөх шаардлагагүй гэж бодож байна” хэмээн боловсон ёсоор хариулжээ.
- Ормузын хоолой: Трампын хүч хэрэглэх санааг Макрон няцааж, энэ нь хөлөг онгоцуудыг “Ираны Хувьсгалт Гвардын цохилтын бай болгох аюултай. Тэд их хэмжээний нөөцтэй, бас баллистик пуужин гэх мэт бусад зэвсэгтэй” хэмээн анхааруулав.
Дональд Трампын гэр бүлийн харилцаа болон хувийн амьдралын талаарх таагүй яриа нь Францын олон нийтийг ихээхэн бухимдуулж, ерөнхийлөгчийнхөө талд нэгдэхэд хүргэсэн байна. Францын тал Ойрх Дорнодын хурцадмал байдлыг цэргийн хүчээр бус, дипломат аргаар зохицуулах байр суурьтаа бат зогсохоо ийнхүү дахин нотоллоо.
Эх сурвалж: BBC
