Table of Contents
Шүүхийн шийдвэр
2025 оны есдүгээр сарын 17-нд нийслэлийн Баянгол, Хан-Уул, Сонгинохайрхан дүүргийн шүүхэд эхэлсэн Н.Энхбатад холбогдох шүүх хурал өнөөдөр шийдвэрээ гаргалаа. Түүнийг эхнэрээ “Gem mall” худалдааны төвд олон удаа хутгалж амь насыг нь хохироосон хэрэгт буруутай гэж үзэн бүх насаар хорих ял оноосон байна.
Шүүх бүрэлдэхүүнд шүүгч Б.Булгантамир, Н.Далайхүү, Г.Энхцэцэг нар оролцсон бол улсын яллагчаар нийслэлийн прокурор С.Баярмаа ажиллажээ.
Эрүүгийн хуулийн заалтууд
Улсын яллагч Н.Энхбатыг Эрүүгийн хуулийн 10.1 дүгээр зүйлийн 2.1 буюу “онц харгис хэрцгийгээр”, 2.8 буюу “гэр бүлийн хүчирхийлэл үйлдсэн” гэдэг заалтаар ялласан байна. Энэ заалтад 12-20 жил, эсвэл бүх насаар хорих ял оноох боломжтой бөгөөд үйлдлийн шинж чанарыг харгалзан бүх насаар хорих шийдвэрийг шүүх санал нэгтэйгээр дэмжжээ. Өмнө нь цагдан хоригдсон 82 хоногийг хорих ялаас хасахаар тогтов.
Хохирлын нөхөн төлбөр
Шүүхийн шийдвэрээр Н.Энхбатаас дараах төлбөрийг гаргуулахаар болжээ. Үүнд:
- Оршуулгын зардалд 19.7 сая төгрөг,
- Сэтгэл санааны хохиролд 162 сая 360 мянган төгрөгийг талийгаачийн хүү Э.Дөлгөөнд,
- Эмнэлгийн зардал 1 сая 477 мянган төгрөгийг ЭМДС-д нөхөн төлүүлэхээр тогтов.
Харин талийгаачийн ар гэрийнхний өмгөөлөгчийн 10 сая төгрөгийн зардлыг Н.Энхбатаас гаргуулах тухай нэхэмжлэлийг шүүх хэрэгсэхгүй болгосон байна.
Хүүхдүүдийн эрхийг хамгаалах шийдвэр
Талийгаачийн насанд хүрээгүй хоёр хүүхдийн эрх ашгийг хамгаалах зорилгоор асран хамгаалагчийг тогтоож өгөхийг Баянгол дүүргийн Засаг даргад шүүх даалгав.
