Элон Маск өөрийн компанийн xAI-аас гаргах Grokipedia нэртэй шинэ интернет нэвтэрхий толь бичгийг хөгжүүлж байгаагаа зарлалаа. Тэр үүнийг “Wikipedia-гаас мэдэгдэхүйц илүү сайжруулсан хувилбар” гэж тодорхойлсон байна.
Одоогоор төслийн нээлтийн яг огноо тодорхойгүй байгаа ч Grokipedia-г илүү нээлттэй, эх сурвалжийн талаарх хязгаарлалт багатай платформ гэж танилцуулжээ.
Элон Маск энэ тухайгаа X (хуучнаар Twitter) платформ дээр мэдэгдсэн байна.
Grokipedia төслийн санааны талаар
Энэхүү санаа нь Wikipedia-ийн дүрэм журмыг шүүмжилсэн маргааны дараа гарч ирсэн юм. Хуучин хөрөнгө оруулалтын банкир Жон Лефевр Wikipedia-ийн бодлого Fox News зэрэг мэдээллийн сувгуудыг эх сурвалж болгон ашиглахыг хориглодог гэж мэдэгдсэн бол хөрөнгө оруулагч Дэвид Сакс “Wikipedia-ийн нийтлэлүүдийг байнга засаж, өөрчилдөг атлаа олон нийт түүнд сохроор итгэдэг, мөн түүний өгөгдлийг хиймэл оюун загварууд сургахад ашигладаг” гэж шүүмжилсэн байна.
Элон Маск энэ шүүмжлэлд хариу өгөхдөө Grokipedia-г xAI-ийн баг хөгжүүлж байгаа гэж баталсан бөгөөд энэхүү шинэ нэвтэрхий толь нь илүү өргөн хүрээний эх сурвалж ашиглах боломжтой, уян хатан дүрэмтэй систем болох ёстой гэж онцолжээ.
Одоогоор Grokipedia-ийн албан ёсны нээлтийн огноо тодорхойгүй байна.
