Эрүүл амьдралын төлөө бид хамтдаа гүйсэн өдөр

“Хавдрын эсрэг үндэсний аян”-ы 15 жилийн ой тохиосон энэ онцгой жилд, эрүүл ирээдүйн төлөө бидний хамтын хичээл зүтгэлийн бэлгэдэл болсон нэгэн утга төгөлдөр мөч Улаанбаатар хотын зүрхэн дэх Сүхбаатарын талбайд өрнөлөө.

2025 оны тавдугаар сарын 24-ний Бямба гарагт зохион байгуулагдсан “Улаанбаатар марафон” олон улсын гүйлтийн үеэр, “Хавдрын эсрэг үндэсний аян”-ы хамт олон олон нийтэд хандаж:
“Эрүүл амьдралын төлөө хамтдаа гүйцгээе!” хэмээн уриалж, энэхүү спорт, нийгмийн давхар зорилготой үйл ажиллагаанд идэвхтэй оролцов.

Аяны хүрээнд Сүхбаатарын талбайд байрласан асарт мэргэжлийн эмч нар эрүүл мэндийн зөвлөгөө, тэнцвэртэй хооллолт, сэтгэл зүйн зөвлөмж өгч, эрдсийн шинжилгээ хийсэн нь олон хүний анхаарлыг татсан юм. Мөн хүүхдүүдэд зориулсан зургийн хэсэг, фото булан, хөгжөөнт тоглоом, амтат зайрмагны булан нь гэр бүлээрээ ирсэн зочдод мартагдашгүй дурсамж үлдээв.

Түүнчлэн ХААН Банк, Хавдар судлалын үндэсний төв (ХСҮТ), Монголын Үндэсний Олон Нийтийн Радио Телевиз (МҮОНРТ)-ийн хамт олон марафонд оролцож, байгууллагын нийгмийн хариуцлагаа бодит үйлдлээр илэрхийлсэн нь онцлох үйл явдлын нэг байлаа.

15 жилийн хугацаанд “Хавдрын эсрэг үндэсний аян” нийт 136,000 гаруй иргэнийг урьдчилан сэргийлэх үзлэгт хамруулж, 680 хорт хавдрын тохиолдлыг эрт илрүүлэн, 527 яаралтай мэс засал хийж, 11,000 гаруй эмч, мэргэжилтнийг чадавхжуулах сургалтад хамруулсан нь Монгол Улсад хэрэгжсэн хамгийн үр дүнтэй, тогтвортой эрүүл мэндийн хөдөлгөөнүүдийн нэг болоод байна.

Энэхүү аяны гол ивээн тэтгэгч ХААН Банк нь 2007 онд байгуулсан “ХААН Банк сан”-аараа дамжуулан нийгмийн бүхий л салбарт 523 төсөл, хөтөлбөрийг 16.2 тэрбум төгрөгөөр дэмжсэн бол зөвхөн эрүүл мэндийн салбарт 2.5 тэрбум төгрөгийн санхүүжилттэй хоёр томоохон аян хэрэгжүүлсэн байна.

Эрүүл мэнд гэдэг зөвхөн хувь хүний асуудал бус, хамтын үнэ цэнэ юм. Хамтдаа алхсан энэ өдөр бид зөвхөн зам туулсангүй — ирээдүйн эрүүл, аз жаргалтай амьдралын төлөө шинэ итгэл, зоригийг хамтдаа хуваалцлаа.