Table of Contents
69 дэх удаагийн “Eurovision” дууны тэмцээний финал өнгөрсөн ням гарагт Швейцарын Базель хотын “St. Jakobshalle” концертын төвд болж өндөрлөлөө. Тус тэмцээнд Австри улсаас оролцсон 24 настай дуучин JJ “Wasted Love” нэртэй бүтээлээрээ 436 оноо авч, шүүгчид болон үзэгчдийн саналын дүнгээр түрүүлсэн байна.
JJ буюу жинхэнэ нэрээрээ Йоханнес Питч нь Венийн дуурийн театрын контртенор бөгөөд поп-опера болон электроник хөгжмийн хослолоор бүтээсэн дуугаараа Европ даяар танигдлаа. Тэрбээр шагналаа гардан авах үеэр:
“Хайр сэтгэл бол энэ дэлхийн хамгийн хүчтэй зүйл. Бүгдээрээ хайр түгээцгээе” хэмээн уриалжээ.
Филиппин-Австрийн бахархал
JJ нь Австри болон Филиппин гаралтай бөгөөд тэмцээнд оролцохын тулд Венийн дуурийн театрын ажлаасаа чөлөө авч, бүтээлдээ төвлөрсөн байна. Түүний ялалтад Франкфурт дахь Филиппинийн Ерөнхий консулын газар талархал илэрхийлж:
“Европын энэ том тэмцээнд түрүүлсэн нь Филиппин улсын хувьд бахархалтай мөч боллоо” хэмээжээ.
JJ-ийн тайзны ард түүний 85 настай өвөө болон 4 сартай дүү нь ч байжээ.
Австрийн “Eurovision” дахь гурав дахь ялалт
- 1966 онд Уго Юргенс “Merci, Cherie” дуугаараа
- 2014 онд Кончита Вурст “Rise Like a Phoenix” дуугаараа
- 2025 онд JJ “Wasted Love” дуугаараа
Ийнхүү Австри улс “Eurovision” дууны тэмцээнд гурав дахь удаагаа түрүүлсэн түүхтэй боллоо.
Дэд байрууд ба дуулиан
- 2-р байр – Израилын Ювал Рафаэль “New Day Will Rise” – 357 оноо
- 3-р байр – Эстонийн Tommy Cash “Espresso Macchiato” – 356 оноо
- 4-р байр – Швед
- 5-р байр – Итали
Израилын оролцоо, ялангуяа хоёрдугаар байранд шалгарсан нь олон нийтийн шүүмжлэл, эсэргүүцэлтэй тулгарчээ. Түүний үзүүлбэрийн үеэр хоёр хүн тайзан дээр гарах оролдлого хийж, Базель хотод Палестиныг дэмжигчдийн жагсаал цуглаан болж, цагдаа нартай мөргөлдөөн үүссэн байна.
Онцлох мөчүүд
- 52 настай Польшийн дуучин Жюстина Стецковска 30 жилийн дараа “Eurovision”-д оролцож, дээд амжилт тогтоов.
- Селин Дион видео мэндчилгээ илгээсэн ч тайзан дээр гарч ирж дуулна гэсэн хүлээлт биелэлгүй, үзэгчдийг гонсойлгосон байна.
Шууд дамжуулалт, ирэх жилийн төлөвлөгөө
Финалын тоглолтыг 40 мянга гаруй үзэгч танхимаас үзсэн бол Европ даяар 160 сая гаруй хүн шууд дамжуулалтаар үзжээ. Австрийн дуучин JJ-ийн ялалтаар “Eurovision 2026” тэмцээнийг Австри улс зохион байгуулах эрхтэй болсон байна.
