БНХАУ-ын Жайшинг хотод гуравдугаар сарын 30-нд зохион байгуулагдсан марафон гүйлтийн Азийн аварга шалгаруулах тэмцээнд 18 орны 54 тамирчин (эрэгтэй 34, эмэгтэй 20) хурд хүчээ сорьсон байна. Монгол Улсаас дасгалжуулагч Б.Доржпаламын удирдлага дор дөрвөн тамирчин оролцож, эмэгтэйчүүдийн ангилалд Г.Хишигсайхан 2:28.56 цагийн амжилтаар хүрэл медаль хүртлээ.
Энэ нь Г.Хишигсайханы хувьд Азийн аварга шалгаруулах марафон гүйлтийн хоёр дахь медаль бөгөөд 2024 онд алтан медаль хүртэж байсан бол энэ удаа хүрэл медалиар амжилтаа үргэлжлүүллээ.
Харин эрэгтэй ангилалд Монгол Улсын гавьяат тамирчин Б.Сэр-Од 2:15:13 цагийн амжилтаар VI байрт шалгарч, Монголын тамирчдын дундаас хамгийн өндөр амжилтыг үзүүлсэн байна.
Монголын марафончдын амжилтын товчоон:
- Б.Сэр-Од
- 2013 он – Алтан медаль
- 2008 он – Мөнгөн медаль
- Ц.Бямбажав
- 2017 он – Хүрэл медаль
- Г.Хишигсайхан
- 2024 он – Алтан медаль
- 2025 он – Хүрэл медаль
Ийнхүү Монголын марафончид Азийн аварга шалгаруулах тэмцээнээс нийт 2 алт, 1 мөнгө, 2 хүрэл медаль хүртсэн амжилттай түүхийг үргэлжлүүлж байна.
