Гаалийн Ерөнхий Газар (ГЕГ)-аас хар тамхи, мансууруулах болон сэтгэцэд нөлөөт бодисыг улсын хилээр хууль бусаар нэвтрүүлэх гэмт хэрэгтэй тэмцэх зорилгоор хяналт шалгалтаа улам бүр чангатгаж байгааг мэдээллээ. Эрсдэл өндөртэй хилийн боомтуудад сүүлийн үеийн рентген төхөөрөмжүүд суурилуулснаар илрүүлэлтийн үр дүн мэдэгдэхүйц нэмэгдсэн байна.
ГЕГ-ын Хар тамхи, мөнгө угаахтай тэмцэх хэлтсийн дарга Г.Ганзориг энэ талаар дараах мэдэгдлийг хийв. Тэрбээр “Гаалийн байгууллага нь үндэсний аюулгүй байдлыг хангах тусгайлсан чиг үүргийнхээ хүрээнд мансууруулах болон сэтгэцэд нөлөөт бодистой тэмцэх шат дараалсан арга хэмжээг авч хэрэгжүүлж байна” хэмээв.
Эдгээр арга хэмжээний үр дүнд 2023 онд 16 удаа, 2024 онд 17 удаа улсын хилээр хууль бусаар мансууруулах бодис нэвтрүүлэхийг завдсан хэрэг илэрч, холбогдох байгууллагуудад шилжүүлсэн байна. Харин 2025 оны эхний дөрвөн сарын байдлаар найман удаагийн ийм төрлийн гэмт хэргийг таслан зогсоожээ. Хэргүүдийг хуулийн байгууллагад харьяаллын дагуу шилжүүлээд ажиллаж байгааг онцолсон юм.
Эдгээрээс онцлох нэгэн тохиолдол нь 2025 оны эхний улиралд Зүүн Өмнөд Азиас ирсэн 510 грамм синтетик төрлийн мансууруулах бодисыг илрүүлж, холбогдох хууль хяналтын байгууллагад шилжүүлсэн явдал юм. Мөн Европын Холбооны улсаас Монгол Улсын иргэний нэр дээр илгээсэн, улс хоорондын шуудангийн илгээмжээр дамжуулан орж ирсэн 840 орчим грамм бодисыг гаалийн хяналтаар илрүүлсэн байна.
Г.Ганзоригийн хэлснээр, гадаад улсаас ирэхдээ танихгүй хүнээс илгээмж авах, дайвар ачаа авч явах нь хууль зөрчих эрсдэлтэй тул иргэд онцгойлон анхаарах хэрэгтэйг онцолжээ. Тэрээр иргэдийг болгоомжтой, сэрэмжтэй байхыг уриалсан юм.
