Саяхны нэгэн судалгаагаар өмнө нь бүрэн судлагдаагүй байсан дархлааны тусгай эсүүд харшлын урвалд чухал үүрэг гүйцэтгэдэг болохыг тогтоолоо. Энэхүү судалгаа нь бага насны хүүхдүүдийн дархлааны систем хэрхэн бүрэлддэг, мөн яагаад хотод өссөн хүүхдүүд хөдөө орон нутгийн хүүхдүүдээс харшилд илүү өртөмтгий байдаг талаар гүнзгий дүгнэлт өгч байна.
Рочестерийн Анагаах Ухааны Төвийн (URMC) Хүүхдийн эмчилгээний тэнхмийн эрдэмтэд “Th2 эс” хэмээн нэрлэгддэг Т эсийн өвөрмөц бүлгийг илрүүлжээ. Судалгаанд хотын болон хөдөөний нярай хүүхдүүдийн цусны дээжийг авч, тэдгээрийн дархлааны эсийн ялгааг харьцуулсан байна.
Судалгааны гол ололтууд:
- Хотын нярай хүүхдүүдэд Th2 эсийн төвшин хамаагүй өндөр байсан нь тэд харшилд илүү өртөмтгий болохыг илтгэнэ.
- Харин хөдөө орон нутагт төрсөн нярай хүүхдүүдэд дархлааны системийг тэнцвэржүүлж, харшлын хариу урвалын эрсдлийг багасгадаг зохицуулалтын Т эсийн хэмжээ илүү өндөр байжээ.
- Хөдөөгийн орчин бактер, бичил биетээр баялаг байдгаараа дархлааны системийг илүү тэсвэртэй болгож хөгжүүлдэг болохыг эрдэмтэд тэмдэглэв.
Эдгээр үр дүн нь хүүхдийн эрүүл мэндийг хамгаалахад чухал ач холбогдолтой бөгөөд ирээдүйд харшлын өвчнийг бууруулах шинэ арга замд хөтөлж болзошгүй юм.
