Гэр хороололд орчин үеийн спорт цогцолбор нээгдлээ

Сонгинохайрхан дүүргийн 3 дугаар хороонд шинэ спорт цогцолбор баригдаж, улсын комисст хүлээлгэн өгснөөр иргэдийн хэрэглээнд орлоо.

2.1 га талбайг хамарсан уг иж бүрэн спортын цогцолборт:

• Олон улсын стандартад нийцсэн хөлбөмбөгийн талбай
• 3х3 болон 5х5 сагсан бөмбөгийн талбай
• Газрын теннисний хоёр талбай
• Зургаан замтай гүйлтийн зам
• Хүүхдийн тоглоомын талбай
• Бялдаржуулах тоног төхөөрөмж бүхий хэсэг
• Орчны гэрэлтүүлэг, тохижилтын ажлууд хийгджээ.

Энэхүү шинэ байгууламж ашиглалтад орсноор хүүхэд, залуус спортын төрөл бүрээр тогтмол хичээллэх, чөлөөт цагаа зөв боловсон өнгөрүүлэх нөхцөл бүрдэж байна.

Цогцолборын бүтээн байгуулалтыг “Аглут” ХХК гүйцэтгэсэн бол нийслэлийн Хөрөнгө оруулалтын газар захиалагчийн техник хяналтыг хэрэгжүүлжээ.