Нийслэлийн Засаг дарга Х.Нямбаатар нийслэлийн өмчийн “Өргөө” зочид буудлыг буцаан авах тухай мэдэгдэл хийлээ. Тэрээр тус зочид буудлыг хууль бусаар 10 гаруй жил эзэмшиж байгаа асуудлыг шийдвэрлэхээ илэрхийлэв.
“Өргөө” зочид буудлыг нийслэлийн өмчид буцаана
Х.Нямбаатар даргын хэлснээр, Өмчийн харилцааны газар болон холбогдох албан тушаалтнууд “Өргөө” зочид буудлыг чөлөөлж авах ажиллагааг эхлүүлэхээр болсон байна.
Тэрбээр дараах үгийг хэлэв:
“2013, 2014 онд энэ зочид буудлыг нийслэл өмчлөх шийдвэр гарсан байдаг. Гэтэл Монгол Улсын гурав дахь ерөнхийлөгч Н.Энхбаярын хамаарал бүхий хүмүүс ‘Өргөө’ зочид буудлыг 10 гаруй жил хууль бусаар эзэмшиж байна. Ерөнхийлөгч байсан хүн нийслэлийн өмчийн үл хөдлөх хөрөнгийг хууль бусаар авч, 10–20 жил ашиглах ёсгүй. Н.Энхбаяр дарга та шударгаар суллаж өгөх ёстой.”
Мөн тэрбээр нэмэгдүүлэн:
“Н.Энхбаяр даргаас болж өмнө нь Билэгт, Батбаяр дарга нар ял авсан. Би гурав дахь нь болмооргүй байна. Өргөө зочид буудлыг чөлөөлөх хугацаа өгч байгаа. Хэрэв энэ хугацаанд нийслэлийн өмчийг чөлөөлөхгүй бол НИТХ-ын 45 төлөөлөгч нам харгалзахгүйгээр тус барилгын үүдэнд очиж шаардан сууна.”
Хамаарал бүхий бусад өмчийн асуудлууд
Х.Нямбаатар даргын мэдээлснээр, Н.Энхбаяр дарга өмнөх дарга Д.Сумъяабазарыг шахаж, Хуримын ордны хойд талд 700 м.кв газар авсан хэмээн онцолж, уг газрыг цуцлах арга хэмжээ авна гэж мэдэгдлээ.
Түүнчлэн өмнө нь нийслэл дараах өмчүүдийг буцаан авсан байна:
- III, IV хороололд байрлах Шуудангийн 24 дүгээр салбарын барилга – 1.6 тэрбум төгрөгөөр,
- Эмийн үйлдвэрийн газар – 9.3 тэрбум төгрөгөөр,
- “Нарны титэм” барилгын “Ж” блокийн зүүн жигүүрт байрлах объект – 1.9 тэрбум төгрөгөөр.
Ингэснээр нийслэл нийт 12.8 тэрбум төгрөгийн үнэлгээтэй өмчийг буцаан авсан байна.
