АНУ-ын Кейс Уэстерн Резерв их сургууль болон Кливлэндийн нэр хүндтэй эмнэлгийн эмч, судлаачид нойр булчирхайн хорт хавдрын эсрэг вакцин бүтээж, шинжлэх ухаанд тэсрэлт хийлээ. Энэхүү вакцин нь анагаах ухаанд шинэ найдварын гэгээ асааж, хамгийн хүнд хэлбэрийн хорт хавдрын эсрэг тэмцэх боломжийг нээж өгч байна.
Нойр булчирхайн хорт хавдар хамгийн аюултай төрөлд тооцогддог бөгөөд нийт өвчтөнүүдийн зөвхөн 13 хувь нь оношлогдсоноос хойш таван жилээс дээш насалдаг. Энэ төрлийн хорт хавдар ихэвчлэн хожуу үе шатандаа орж байж шинж тэмдэг илэрдэг тул эрт оношлогдох нь маш ховор. Одоогийн байдлаар хийгддэг мэс засал, хими болон туяа эмчилгээ нь амьдрах хугацааг бага зэрэг уртасгадаг ч бүрэн эдгэрэлт маш ховор тохиолддог.
Харин шинэ вакцин нь дархлааны тогтолцоог “сургах” замаар хорт хавдрын эсрэг тэмцэх аргыг нэвтрүүлж буй юм. Судлаачид хортой эсүүдэд нийтлэг тохиолддог мутацид үндэслэн тусгай антигенийг боловсруулж, дархлааны системийг хорт хавдрын эсийг таньж, идэвхтэй устгахад чиглүүлжээ. Энэ нь дархлааны хамгийн хүчтэй хамгаалалт болох Т-эсийн үйл ажиллагааг эрчимжүүлдэг байна.
Эмнэлзүйн туршилтын явцад лабораторийн туршилтын амьтдад нойр булчирхайн хорт хавдрын эсүүд хэдхэн сарын дотор бүрэн устаж, ул мөргүй болсон нь уг вакцины үр нөлөөг батлах чухал үзүүлэлт боллоо.
Судлаачид цаашид энэ вакциныг зөвхөн эмчилгээний зориулалтаар бус, мөн хорт хавдрын удамших эрсдэлтэй хүмүүст урьдчилан сэргийлэх зорилгоор ашиглах бүрэн боломжтой гэж үзэж байна. Ийм байдлаар энэхүү вакцин нь ирээдүйн хорт хавдрын эсрэг дархлааны хувьсгалыг эхлүүлж мэдэх юм.
