2025 оны тавдугаар сарын 8-ны оройн 22:23 цагийн орчимд Хэнтий аймгийн Өмнөдэлгэр сумаас баруун хойд зүгт 109 км, Батширээтээс баруун тийш 79 км, Төв аймгийн Мөнгөнморьт сумаас зүүн хойд зүгт 76 км-ийн зайд 4.7 магнитудын хүчтэй газар хөдлөлт болсон талаар Онцгой байдлын ерөнхий газраас мэдээллээ.
Газар хөдлөлтийн чичирхийлэл Хэнтий аймгийн Өмнөдэлгэр, Батширээт, Биндэр, мөн Төв аймгийн Мөнгөнморьт сумын нутаг дэвсгэр болон нийслэл Улаанбаатар хотод тодорхой хэмжээнд мэдрэгдсэн байна. Гэвч одоогийн байдлаар хүний амь нас, эд хөрөнгийн хохирол бүртгэгдээгүй бөгөөд урьдчилсан байдлаар ямар нэгэн ноцтой хохиролгүй хэмээн мэдээлжээ.
Онцгой байдлын ерөнхий газрын мэдээлснээр, 2025 он гарснаас хойш дөрөвдүгээр сарын 1-ний өдрийг хүртэл Монгол Улсад нийт 12 удаа, 3.5–5.1 магнитудын хүчтэй газар хөдлөлт бүртгэгдээд байгаа нь манай улсын зарим бүс нутаг газар хөдлөлтийн идэвхтэй байгааг харуулж байна.
