Монгол Улсын Үндэсний Хавдар Судлалын Төвд (ҮХСТ) хорт хавдрын променев эмчилгээний үйлчилгээний хүртээмж эрс сайжирч, өмнө нь нэгээс хоёр сар хүлээдэг байсан иргэд хоёрхон хоногийн дотор шаардлагатай эмчилгээгээ авч эхэлжээ. Энэ шинэчлэл нь онкологийн тусламж үйлчилгээний саатлыг арилгаж, эмчилгээний хүртээмжийг нэмэгдүүлэх зорилготой бөгөөд эрүүл мэндийн салбарын үр дүн дээр суурилсан санхүүжилтийн бодлоготой холбоотой юм.
ҮХСТ-ийн променев эмчилгээний тасгийн эрхлэгч М.Минжмаа мэдээлэхдээ, үр дүн дээр суурилсан санхүүжилтээс үүдэн эмч нарын нэмэгдэл цалин өссөн нь үйлчилгээний чанар, хурдыг сайжруулах нөхцөл болсон гэжээ. Түүний хэлснээр, иргэд одоо хоёр өдрийн дотор л шаардлагатай эмчилгээг авах боломжтой болсон нь эрүүл мэндийн салбарын хувьд чухал ахиц гэж үзэж байна.
Эрүүл мэндийн сайд Т.Мөнхсайхан энэхүү шинэчлэлтэй холбоотойгоор, төвлөрлийг сааруулах бодлогын хүрээнд эмнэлгийн үйлчилгээг зөвхөн ҮХСТ-д төвлөрүүлэх бус, орон нутгийн иргэдэд ойртуулан хүргэхийн төлөө ажиллаж байгаагаа мэдэгдэв. Тэрээр, 2025 оны зургаадугаар сарын 3-ны өдөр ҮХСТ-д зургаа дахь удаагаа ажиллаж, хими эмчилгээний хүлээлтийн хугацааг арилгахаар зорьж буйгаа илэрхийлсэн. Харин ҮХСТ-ийн захирал М.Адилсайхан нэг сарын хугацаанд хими эмчилгээний хүлээлтийг арилгаж чадна гэж үзэж байгаагаа онцолсон.
Өнөө өглөө 10:00 цагаас эхлэн Эрүүл мэндийн сайдын удирдсан баг ҮХСТ-д ажиллаж, иргэд, үйлчлүүлэгчдийн санал бодлыг сонсон, урьдчилан бүртгэх системийн хэрэгжилт, үр дүнд суурилсан санхүүжилт, 4-р эмнэлгийн барилга, эрхтэн шилжүүлэн суулгах хагалгааны байдал зэрэг олон асуудлыг хэлэлцэн, зарим асуудлыг газар дээр нь шийдвэрлэсэн байна.
