Хүмүүсийн хамт хагас марафонд гүйсэн анхны хүн дүрст роботууд

Өнгөрсөн бямба гарагт Бээжин хотын гудамжуудаар дэлхийд анх удаа хүн дүрст роботууд бодит марафонд оролцож, олон мянган гүйгчтэй зэрэгцэн уралдсан түүхэн үйл явдал боллоо.

21 км-ийн зайг туулах хагас марафонд 21 робот оролцсон нь шинжлэх ухаан, технологийн хөгжлийг бодитоор харуулсан сонирхолтой туршилт байв. Droid VP, Noetix Robotics зэрэг Хятадын өндөр технологийн компаниудын бүтээсэн эдгээр роботын өндөр 1.2-1.8 метрийн хооронд хэлбэлзэж байсан бөгөөд зарим нь хүний хөдөлгөөнийг төгс дуурайсан инээмсэглэл, нүд ирмэх үйлдэл ч хийж байв.

Тэмцээний онцлох мөчүүд:

• Тянгон Ультра нэртэй робот уралдааныг хоёр цаг, 40 минутын хугацаанд туулж, роботуудаас хамгийн түрүүнд барианд орсон байна. Уг роботыг Бээжингийн Хүн Роботын Инновацын Төв бүтээжээ.
• Харьцуулбал, тухайн уралдааны эрэгтэй төрөлд түрүүлсэн хүний үзүүлэлт 1 цаг 2 минут байлаа.
• Зарим робот гүйлтийн гуталтай байснаас гадна нэг нь гартаа боксын бээлий зүүж сонирхол татав.
• Гүйлтийн туршид мэргэжилтнүүд роботуудаа дагаж, техникийн тусламж үзүүлж байсан бөгөөд Тянгон Ультрагийн батарейг гурван удаа сольжээ.

Тус уралдаанд оролцсон роботуудаас нэг нь зам дээр унаж, хэсэг хугацааны дараа босож гүйсээр бариа руу орсон бол нөгөө нь замаас хазайж, хашлага мөргөх зэрэг сонин үйл явдал ч болсон байна.

Тянгон Ультрагийн амжилт нь роботын урт хөл, хүний гүйлтийн хөдөлгөөнийг дуурайсан алгоритм, нарийн тооцоолсон зохион байгуулалттай шууд холбоотой хэмээн бүтээлч багийн технологийн ахлах Тан Жянь онцолсон бөгөөд тэрээр:
“Би гайхуулж, сайрхахыг хүсэхгүй байгаа ч Өрнөдийн ямар ч компанийн робот Тянгон Ультрагийн амжилтыг гүйцэхгүй” хэмээжээ.

Тус роботын бүтээн байгуулалтанд Хятадын төрийн өмчит байгууллагууд 43 хувийг эзэмшдэг бол Xiaomi, UBTech зэрэг хувийн компаниуд ижил хувиар оролцдог байна. UBTech нь Хятадад хүн дүрст робот хөгжүүлэлтийн тэргүүлэгч компани хэмээн өргөмжлөгддөг.

Энэ удаагийн марафон нь Хятадад өмнө нь хийж байсан роботын гүйлтийн туршилтаас ялгаатай нь анх удаа хүнтэй зэрэгцэн бодит тэмцээнд оролцсон явдал байв.