Дэлхийн томоохон зах зээлүүд дээр «Тесла» (Tesla) цахилгаан автомашины борлуулалт буурч байгаа ч, тус компани Хятадын компаниудтай өрсөлдөөнд ялагдаж буй Европт хамгийн хурц асуудлуудтай тулгарч байна.
Medee.news-ийн дамжуулснаар, энэ тухай Reuters агентлаг мэдээлжээ.
«Тесла»-гийн асуудлууд Европт хамгийн хурцаар мэдрэгдэж байна. Энд арваад гаруй цахилгаан автомашин 30 мянган доллараас доош үнээр зарагдаж байгаа бөгөөд шинэ загварууд нэмэгдэх төлөвтэй байна. Хятадын брэндүүдийн давалгаа Европт гайхалтай загвар, цахилгаанаас эхлээд бензин, хосолмол хөдөлгүүртэй автомашины өргөн сонголттойгоор орж ирж байна» гэж нийтлэлд дурджээ.
Европын Автомашин Үйлдвэрлэгчдийн Холбооны мэдээллээр, энэ оны аравдугаар сард Европ дахь «Тесла»-гийн цахилгаан автомашины борлуулалт 2024 оны мөн үетэй харьцуулахад 48.5%-аар буурчээ. 2025 оны нийт дүнгээр компанийн бүс нутаг дахь борлуулалт 30%-аар унасан байна. Гэтэл энэ хугацаанд Европ дахь салбарын нийт цахилгаан автомашины борлуулалт 26% -аар өссөн.
Харьцуулж үзвэл, Хятадын BYD конгломератын Европ дахь аравдугаар сарын борлуулалт 17 мянга гаруй автомашинд хүрч, «Тесла»-гийн үзүүлэлтээс хоёр дахин их байна.
Шинжээчид Америкийн компани Хятадын үйлдвэрлэгчдийн санал болгож буй олон төрлийн бүтээгдэхүүнтэй өрсөлдөх чадваргүй байна гэж үзэж байна. Европт зөвхөн Америкийн хоёр загвар болох Model 3 болон хямд Model Y л зарагдаж байгаа юм.
«Үүний зэрэгцээ бусад үйлдвэрлэгчдийн цахилгаан автомашинууд улам бүр алдартай болж байна. Их Британид Хятадын олон шинэ өрсөлдөгчийг багтаасан 150 гаруй брэндийн цахилгаан автомашинууд худалдаанд гарсан» гэж тус хэвлэл тодотгов.
Компанийн үндсэн асуудлуудаас гадна, «Тесла»-гийн гүйцэтгэх захирал Илон Маскийн улс төрийн байр суурь, ялангуяа түүний Европын орнуудын консерватив хүчнүүд, тухайлбал Германы «Германы төлөөх Альтернатив» намыг ил тод дэмжсэн нь борлуулалтын түвшинд нөлөөлсөн байж болзошгүйг тэмдэглэжээ.
