БЭЭЖИН, 2025 оны дөрөвдүгээр сарын 3 /TASS/ — АНУ-ын Ерөнхийлөгч Дональд Трампын гаргасан гадаадын бараанд татвар ногдуулах шинэ бодлогын хариуд БНХАУ хатуу мэдэгдэл хийж, өөрийн эрх ашиг, хууль ёсны эрхийг хамгаалах хариу арга хэмжээ авахаа илэрхийллээ.
Хятадын Худалдааны яамнаас гаргасан мэдэгдэлд:
“Татварын нэмэгдэл нь олон улсын хууль ёсны эрх ашгийг ноцтой зөрчиж байгаа бөгөөд нэг талыг барьсан сүрдүүлгийн тод жишээ мөн. Энэ нь АНУ-ын дотоод асуудлыг шийдэхгүй, харин ч Америк болон дэлхийн эдийн засгийн тогтвортой байдалд сөргөөр нөлөөлнө” хэмээн дурджээ.
Мөн тус мэдэгдэлд:
- Трампын протекционист бодлого нь дэлхийн эдийн засгийн өсөлтийг сааруулж,
- Үйлдвэрлэл, нийлүүлэлтийн сүлжээнд тогтворгүй байдал бий болгох эрсдэлтэй,
- Худалдааны дайн ялагчгүй, харин протекционизм нь мухардал руу хөтөлнө гэдгийг онцолсон байна.
Хятадын тал АНУ-ыг:
- Нэг талыг барьсан татварын бодлогоо нэн даруй цуцлах,
- Худалдааны түншүүдтэйгээ тэгш эрхийн үндсэн дээр хэлэлцээ хийх,
- Үүссэн санал зөрөлдөөнийг зохих ёсоор дипломат арга замаар шийдвэрлэхийг уриалжээ.
Ерөнхийлөгч Трамп өмнөх өдөр бүх гадаад бараанд наад зах нь 10 хувийн татвар ногдуулах шийдвэр гаргаж, Хятадын бараанд 34 хувийн татвар тогтоосон тухайгаа албан ёсоор мэдэгдсэн билээ.
