iPhone 17-ийн амжилт Apple-ийн үнэлгээг 4 их наяд долларт хүргэлээ

Apple-ийн хувьцааны өсөлт

Шинээр худалдаанд гарсан iPhone 17-ийн өндөр эрэлтийн ачаар Apple компанийн хувьцааны үнэ түүхэндээ хамгийн өндөр түвшинд хүрсэн байна. 2025 оны аравдугаар сарын 20-ны Даваа гарагт компанийн зах зээлийн үнэлгээ 4 их наяд ам.долларт тун ойртжээ. Тодруулбал, Apple-ийн нэгж хувьцааны үнэ 4.2 хувиар өсөж, 262.9 ам.доллар болсноор зах зээлийн нийт үнэлгээ 3.9 их наяд ам.долларт хүрсэн байна.

Дэлхийн зах зээлийн жагсаалт

Энэхүү амжилтаараа Apple нь 4 их наяд ам.долларын үнэлгээнд хүрсэн дэлхийн гурав дахь компани болох замдаа явж байна. “Companies Market Cap” вэбсайтын мэдээлснээр дэлхийн хамгийн өндөр үнэлгээтэй компаниудын жагсаалтыг Nvidia тэргүүлж байгаа бол Apple удаах байрыг эзэлж байна. Хэрвээ Apple-ийн 3.9 их наяд ам.долларын үнэлгээг улс орны Дотоодын Нийт Бүтээгдэхүүн (ДНБ)-тэй харьцуулбал, зөвхөн дөрвөн улс л ийм өндөр ДНБ-тэй байх юм.

iPhone 17-ийн эрэлт ба зах зээлийн хэтийн төлөв

“Evercore ISI” фирмийн шинжээч “БНХАУ-д саяхан цахим захиалга нээсэн нь эерэг нөлөөгөө арван хоёрдугаар сар хүртэл үзүүлж магадгүй. Эхэн үеийн захиалгын тоо баримтыг харвал бусад бүстэй харьцуулахад БНХАУ-д эрэлт өндөр байгааг харуулсан” гэжээ. Apple компани өнгөрсөн есдүгээр сард iPhone-ийн шинэ загварыг болон бусад бүтээгдэхүүнээ танилцуулсан юм. АНУ-ын гаалийн татварын нөлөөллөөс болж үйлдвэрлэлийн өртөг нэмэгдэнэ гэсэн болгоомжлол байсан ч Apple ухаантай бодлого баримталж, утасныхаа үнийг тогтвортой хадгалж чадсан байна.