Европын эмэгтэйчүүдийн хөлбөмбөгийн аварга шалгаруулах тэмцээний хагас шигшээ тоглолтод Испанийн эмэгтэй шигшээ баг хүчтэй өрсөлдөгч болох Германы багийг 1:0 харьцаагаар буулган авч, түүхэндээ анх удаа Европын аваргын финалд шалгарлаа.
Швейцарын Цюрих хотын “Летцигрунд” цэнгэлдэх хүрээлэнд болсон энэ тоглолт нэмэлт цагт шийдэгдсэн бөгөөд шийдвэрлэх гоолыг “Барселона” багийн хагас хамгаалагч, сүүлийн хоёр жил дараалан “Алтан бөмбөг”-ийн эзэн болсон Айтана Бонмати 113 дахь минутад Афина дель Кастильогийн дамжуулсан бөмбөгийг Германы хаалганд оруулснаар тоглолтын хувь заяаг шийдсэн юм.
Финалын тоглолт 7-р сарын 27-нд Базел хотноо болох бөгөөд испани бүсгүйчүүд Английн шигшээтэй Европын аваргын төлөө өрсөлдөнө. Хоёр баг 2023 оны эмэгтэйчүүдийн ДАШТ-ий финалд учраа таарч, Испани 1:0-ээр ялснаар дэлхийн аварга болсон билээ.
Түүхэн харьцуулалт:
- Испанийн эмэгтэй шигшээ ЕАШТ-ий финалд анх удаа шалгарч байна.
- Германы шигшээ баг Европын аваргын хамгийн олон буюу 8 удаа түрүүлсэн түүхтэй.
- Английн эмэгтэй шигшээ баг өнгөрсөн удаагийн финалд Германыг 2:1-ээр хожин анх удаа аваргалсан.
- 2024 онд болсон эрэгтэй ЕАШТ-ий финалд мөн Испани, Англи учраа таарч, испаничууд 2:1-ээр ялж байв.
Шийдвэрлэх тоглолтын үр дүн Испани болон Английн эмэгтэй хөлбөмбөгийн хүчийг дахин нэгэнт харуулж, Европын тэргүүн багийг тодруулах чухал мөч болох юм.
