Table of Contents
Japan Airlines (JAL) компанийн Хавайгаас Япон руу чиглэсэн хоёр нислэг архидан согтуурсан нисгэгчийн улмаас томоохон сааталд орсныг тус компани мэдээллээ.
Хонолулу–Чубу Сентрайр чиглэлийн нислэгийн ахмад нисгэгч өмнөх өдөр нь зочид буудалдаа архи хэтрүүлэн хэрэглэсний улмаас нислэгт гарах боломжгүй болсон байна. Компани шуурхайгаар орлох нисгэгчийг томилсон ч энэ нөхцөл байдал Токиогийн Ханеда нисэх буудал руу хийх байсан өөр хоёр нислэгийн хуваарьт нөлөөлжээ. Үүний улмаас нийтдээ 630 гаруй зорчигчийн аялал 18 цаг орчим хугацаагаар хойшлогдсон байна.
Албаныхны хяналт шалгалт
Тохиолдлын дараа Японы Газар, дэд бүтэц, тээвэр, аялал жуулчлалын яамны төлөөлөгчид Токио дахь JAL компанийн төв байранд шалгалт хийжээ.
Өмнө нь ч давтагдсан алдаа
JAL компанид архитай холбоотой зөрчил өмнө нь хэд хэдэн удаа гарч байв:
- 2024 оны 4-р сар: АНУ-д нэг нисгэгч архидан согтуурч, зочид буудалд зүй бус авирласан тул цагдаагаас сануулга авчээ.
- 2024 оны 12-р сар: Мельбурн–Япон чиглэлийн нислэгийн хоёр нисгэгч согтууруулах ундааны шинжилгээнд бүдэрч, нислэг саатсан.
- 2025 оны 1-р сар: JAL компани дахин ийм асуудал давтагдахгүй байх арга хэмжээний тайлангаа тээврийн яаманд хүргүүлж, архины хэрэглээтэй ажилчдын жагсаалтыг гаргаж өгсөн.
Уучлал ба амлалт
Энэ удаагийн тохиолдлын дараа JAL компани олон нийтээс дахин уучлал хүсэж, согтууруулах ундаатай холбоотой бүх эрсдлийг арилгахын төлөө тууштай ажиллахаа мэдэгдэв.
