Монгол Улс 22 жүдочоор Барсигийн “Их дуулга”-д оролцоно

Олон улсын жүдо бөхийн холбооны зохион байгуулдаг Барсигийн “Их дуулга” тэмцээний зургаа дахь цуврал нь энэ сарын 9-нд Казахстаны Астана хотод эхэлнэ. Тус тэмцээнд одоогоор 47 орны 390 гаруй жүдоч оролцохоор мэдүүлэг өгчээ.

Монгол Улсаас шигшээ багийн дасгалжуулагч Ч.Болдбаатар, М.Бундмаа нарын удирдлага дор эрэгтэй 11, эмэгтэй 11 жүдоч Астанаг зорьж байна. Бүрэлдэхүүнд эрэгтэйчүүдээс 60 кг-д Б.Сүхбат, Б.Энэбиш, 66 кг-д Ө.Жанцандорж, Г.Хэрлэн, 73 кг-д Л.Анхзаяа, Б.Эрдэнэбаяр, 81 кг-д Г.Батсугар, 90 кг-д Б.Мөнхбаяр, -100 кг-д Б.Хүдэрчулуун, А.Энхбаяр, +100 кг-д Б.Гончигсүрэн нар оролцох бол эмэгтэйчүүдээс 48 кг-д Г.Наранцэцэг, 52 кг-д М.Нандин-Эрдэнэ, Б.Уранзаяа, 57 кг-д Т.Ариунзаяа, 63 кг-д Л.Энхрийлэн, Б.Ганхайч, 70 кг-д Б.Ням-Эрдэнэ, Д.Есүй, -78 кг-д А.Дуламсүрэн, Ж.Урангоо, +78 кг-д А.Амарсайхан нар зодоглоно.

Барсигийн “Их дуулга” нь ирэх сарын 13-нд Унгарын Будапешт хотод эхлэх насанд хүрэгчдийн ДАШТ-ий өмнө болсон учраас жүдочдын хувьд сорилго болон зохион байгуулагдаж байна. Тэмцээний финалын барилдааныг С1 телевиз эх орон даяар шууд дамжуулна.